حکومت کی تعمیراتی پالیسی کے نتائج سامنے آنا شروع ہوگئے ہیں، وزیراعظم

اسلام آباد: وزیراعظم عمران خان نے کہا ہے کہ پاکستان معاشی بدلاؤ کی حیثیت سے تبدیل ہو رہا ہے اور حکومت کی تعمیراتی پالیسی کے نتائج سامنے آنا شروع ہوگئے ہیں۔

آج اپنے ٹویٹرپیغام میں انہوں نے کہا کہ مالی استحکام کے حصول کے بعد اصلاح و تنظیمِ نو کو مرکزِ ترجیح بناتے ہوئے اب پوری رفتار سے اسلام آباد کو ایک مثالی شہر کی صورت میں ڈھالنے کا وقت ہے دیگر بڑے شہر بھی عزم، شفافیت اور جدت و ایجاد کے سہارے خوددار و خود کفیل معاشی نمو کا اہتمام کر سکتے ہیں۔

مالی استحکام کے حصول کے بعد اصلاح و تنظیمِ نو کو مرکزِ ترجیح بناتے ہوئے اب پوری رفتار سے اسلام آباد کو ایک مثالی شہر کی صورت میں ڈھالنے کا وقت ہے۔ دیگر بڑے شہر بھی قوی عزم، شفافیت اور جدت و ایجاد کے سہارے خوددار و خود کفیل معاشی نمو کا اہتمام کر سکتے ہیں۔
pic.twitter.com/WtEBqrHsgA

— Imran Khan (@ImranKhanPTI) June 4, 2021

ترقی کی جانب رخ موڑتی معیشت اورہماری تعمیراتی پالیسی کی کامیابی کےنتائج مختلف شعبوں سےبرآمد ہورہے ہیں۔ پاکستان بدل رہاہے۔ دیوالیہ پن کےکنارےپر کھڑا سی ڈی اے جسے2017 میں 5.8 ارب کےخسارے کاسامناتھا رواں مالی سال 73 ارب کاسرپلس سمیٹےگاجبکہ26 ارب پہلےسے کھاتوں میں موجودہیں۔بہت خوب ٹیم سی ڈی اے۔

دوسری جانب بینک دولت پاکستان نے پاکستانی معیشت کی کیفیت پر دوسری سہ ماہی رپورٹ برائے مالی سال2020-21گزشتہ روز جاری کر دی۔

رپورٹ میں مالی سال کی دوسری سہ ماہی کے دوران معاشی بحالی کی مضبوطی کو اجاگر کیا گیا ہے۔ یہ بات زیر جائزہ مدت میں صنعتی سرگرمی کی بڑھتی ہوئی رفتار، خریف کی اہم فصلوں (علاوہ کپاس) کی بلند پیداوار اور خدمات کے شعبے میں تیزی سے نمایاں ہے۔

مزید پڑھیں:ن لیگ کو بھی پتا ہے اسحاق ڈار نے معیشت کے ساتھ کیا حشر کیا،شوکت ترین

مالی سال21ء کی پہلی ششماہی میں بڑے پیمانے کی اشیا سازی (ایل ایس ایم)میں7.6فیصد نمو ہوئی جبکہ دوسری سہ ماہی میں یہ بڑھ کر 10.4فیصد تک پہنچ گئی، جو مالی سال07ء کی چوتھی سہ ماہی کے بعد سے ایل ایس ایم میں ہونے والی بلند ترین نمو ہے۔

صنعتی سرگرمی کی رفتار کو بڑھانے میں تعمیرات اور اس سے منسلک صنعتوں اور غذائی پروسیسنگ کی صنعتوں نے اہم کردار ادا کیا۔ تعمیرات کی صنعت کو سازگار پالیسیوں سے فائدہ پہنچا جن میں اس صنعت کے لیے حکومت کے امدادی پیکیج کے تحت مالیاتی اقدامات، نیا پاکستان ہاؤسنگ اسکیم اور اسٹیٹ بینک کے مالی اقدامات شامل ہیں۔