گوگل نیوز پر ہمیں فالو کریںراولپنڈی میں اسٹریٹ کرائمز کی وارداتوں میں تشویشناک اضافہ دیکھنے میں آیا ہے، جڑواں شہر کے عوام غیر محفوظ ہو گئے جنہیں موبائل فون، موٹر سائیکل اور گاڑیوں سے محروم کیا جارہا ہے۔
تفصیلات کے مطابق راولپنڈی میں چوری، ڈکیتی اور لوٹ مار کا سلسلہ جاری ہے۔ تھانہ پیر ودھائی کے علاقے سے خیابانِ سر سید میں مسلح ملزمان رئیس نامی شہری سے موٹر سائیکل چھین کر لے گئے،
تھانہ نیو ٹاؤن کے علاقے مری روڈ سے الطاف نامی شہری کی گاڑی چوری ہوگئی۔ تھانہ بنی کے علاقے بھگواڑی میں مسلح ملزمان ارشد سے 50 ہزار روپے نقد اور موبائل فون چھین کر لے گئے۔
ٹیکسلا تھانے کے علاقے اے ڈبلیو ٹی ویلفیئر سوسائٹی میں مسلح ملزمان توصیف کے دفتر کے گارڈ کو مزاحمت پر زخمی کرکے رائفل اور موبائل فون چھین کر لے گئے۔سکستھ روڈ اسٹاپ پر ارباب اویس سے روڈ اسٹاپ پر فائرنگ کرکے موبائل فون چھین لیا گیا۔
اسی طرح تھانہ سول لائن کے علاقے سے گاڑی، موٹر سائیکل اور تھانہ وارث خان کے علاقے سے موٹر سائیکل چوری ہوگئی۔ راولپنڈی میں اسٹریٹ کرائمز کی بڑھتی ہوئی وارداتوں پر شہری تشویش میں مبتلا ہیں۔
یاد رہے کہ اِس سے قبل راولپنڈی کی تحصیل چکوال کے علاقہ تھانہ صدر کی حدود دھرابی میں ظلم کی انتہا کردی گئی، نوجوان کو اوندھے منہ لٹا کر ڈنڈے سے تشدد کیا گیا جس کی ویڈیو وائرل ہوگئی۔
رواں ماہ وائرل کی گئی ویڈیو میں دیکھا جا سکتا ہے کہ 2 نامعلوم اشخاص نے نوجوان کے ہاتھ اور پاؤں کو جکڑ رکھا ہےجبکہ تیسرا شخص اوندھے منہ پڑے نوجوان پر ڈنڈے برسا رہاہے۔
مزید پڑھیں: راولپنڈی کی تحصیل چکوال میں نوجوان پرتشدد کی ویڈیو وائرل
