گوگل نیوز پر ہمیں فالو کریںکراچی: سندھ اسمبلی نے پاکستان جزائر ڈویلپمنٹ اتھارٹی آرڈیننس کے خلاف قرارداد منظور کرتے ہوئے وفاقی حکومت سے مطالبہ کیا ہے کہ آرڈیننس فوری طور پر واپس لیا جائے۔
تفصیلات کے مطابق سندھ حکومت کی طرف سے پیش کی گئی قرارداد پر حزبِ اختلاف کی سیاسی جماعتوں گرینڈ ڈیموکریٹک الائنس اور تحریکِ انصاف نے احتجاج اور واک آؤٹ کیا۔ تحریک لبیک (ٹی ایل پی) نے بھی قرارداد کی حمایت کی۔
اسمبلی کے فلور سے خطاب کرتے ہوئے وزیرِ اعلیٰ سندھ مراد علی شاہ نے کہا کہ وفاق کی طرف سے جاری کردہ آرڈیننس مکمل طور پر غیر قانونی ہے جبکہ میری ٹائم ایکٹ واضح طور پر کراچی کے ساحل کے اطراف کے علاقائی پانیوں کی نشاندہی کرتا ہے۔
خطاب کے دوران وزیرِ اعلیٰ سندھ نے کہا کہ سندھ حکومت نے جزائر پر نیا شہر تعمیر کرنے کیلئے کوئی این او سی جاری نہیں کیا۔ آئین کے آرٹیکل 132 کے مطابق جزائر کے ساتھ ساتھ سمندری حدود اور معدنیات بھی صوبہ سندھ کی ملکیت ہیں۔
وزیرِ اعلیٰ سندھ نے کہا کہ وفاق کبھی صوبہ سندھ کا استحصال کرنے کا موقع ہاتھ سے جانے نہیں دیتا، وفاقی وزیر میں جرات نہیں کہ اس معاملے پر صوبائی حکومت سے براہِ راست بات کرے۔ جزائر پر قبضے کیلئے راتوں رات آرڈیننس لایا گیا۔
یہ بھی پڑھیں: مشکلات کے باوجود حکومت نے عوام کی مالی مدد کی۔ڈاکٹر حفیظ شیخ
