شیری رحمان کی سندھ اور بلوچستان میں مزید بارشوں کی پیش گوئی

اسلام آباد: وفاقی وزیر برائے ماحولیاتی تبدیلی شیری رحمان نے سندھ اور بلوچستان میں مزید بارشوں کی پیش گوئی کردی۔

تفصیلات کے مطابق وفاقی وزیر برائے ماحولیاتی تبدیلی شیری رحمان نے اپنے ایک بیان میں کہا ہے کہ سندھ اور بلوچستان میں گزشتہ 13 دنوں سے مون سون کا شدید دباؤ ہے۔

شیری رحمان نے کہا کہ مون سون بارشوں کے باعث پیش آنے والی صورتحال کے پیش نظر متعلقہ محکموں اور اداروں کو الرٹ رہنے کی ہدایت کی گئی ہے۔

وفاقی وزیر برائے ماحولیاتی تبدیلی نے کہا کہ سندھ میں 30 سال کی اوسط سے 625 فیصد اور بلوچستان میں 501 فیصد زیادہ بارشیں ہوئی ہیں۔

یہ بھی پڑھیں:

معاہدہ طے پاگیا، آئی ایم ایف پاکستان کو ایک ارب 17 کروڑ ڈالر فراہم کرے گا

اُن کا کہنا تھا کہ محکمہ موسمیات نے کل سے شروع ہونے والی موسلادھار بارشوں میں مزید اضافہ کی پیشنگوئی کی ہے، ایک بار پھر سندھ اور بلوچستان میں زیادہ بارشیں ہوں گی۔

وفاقی وزیر برائے ماحولیاتی تبدیلی شیری رحمان نے مزید کہا کہ متعلقہ حکام کو الرٹ رہنے اور پیشگی اقدامات کرنے کی ہدایت کی گئی ہے۔

دوسری جانب ملک کے بیشتر حصوں میں مون سون کی مزید بارشوں کا امکان ہے۔

محکمہ موسمیات کی جانب سے جاری کردہ بیان کے مطابق (آج ) جمعرات کو پنجاب، کشمیر،خیبر پختونخوا، گلگت بلتستان ، مشرقی بلوچستان اور سندھ میں تیز ہواؤں اور گرج چمک کے ساتھ مزید بارش کا امکان ہے جبکہ زیریں سندھ ، بالائی ووسطی خیبر پختونخوا، بالائی وسطی پنجاب اور کشمیر میں موسلادھار بارش کی توقع ہے۔

محکمہ موسمیات کے مطابق موسلادھار بارش کے باعث کشمیر،راولپنڈی ،اسلام آباد، لاہور ، گوجرانوالہ،سیالکوٹ،نارووال، سرگودھا، فیصل آباد،جھنگ، میانوالی، پشاور، صوابی اورمردان میں نشیبی علاقے زیر آب آنے اور مقامی ندی نالوں میں طغیانی کا خدشہ ہے جبکہ کراچی، حیدر آباد، ٹھٹھہ، بدین، دادو، شہید بینظیر آباد، سکھر ، لاڑکانہ اور جیکب آباد میں نشیبی علاقے زیر آب آنے کا خدشہ ہے۔

محکمہ موسمیات نے کہا ہے کہ ڈیرہ غازی خان اور بلوچستان کے مقامی اور برساتی ندی نالوں میں طغیانی کا خطرہ ہے ۔