کابینہ میں تبدیلیوں کی اندونی کہانی، شیخ رشید کو اپوزیشن سے نمٹنے کیلئے وزیر داخلہ بنایا گیا

اسلام آباد: وفاقی کابینہ میں ردوبدل کی اندرونی کہانی سامنے آگئی، وزیراعظم عمران خان نے اپوزیشن سے نمٹنے کیلئے شیخ رشید کو وزیرداخلہ بنایا، شیخ رشید کو پی ڈی ایم کے لانگ مارچ سے نمٹنے کا ٹاسک دے دیا گیا۔

وزیراعظم عمران خان سے ملاقات میں شیخ رشید نے وزیر داخلہ کی ذمے داریاں سونپنے پر وزیراعظم کا شکریہ ادا کیا، انہوں نے کہا کہ وزیراعظم عمران خان کی توقعات پر پورا اتروں گا، انتہائی اہم ذمے داری کو بخوبی نبھانے کی کوشش کروں گا۔

ذرائع کا کہنا ہے کہ وزیراعظم عمران خان نے اپوزیشن سے نمٹنے کیلئے شیخ رشید کو وزیرداخلہ بنایاہے اور وزیراعظم عمران خان نے شیخ رشید کو پی ڈی ایم کے لانگ مارچ سے نمٹنے کا ٹاسک دے دیا ہے۔

مزید پڑھیں:وفاقی کابینہ میں اکھاڑ پچھاڑ، شیخ رشید وزیرداخلہ، اعظم سواتی وزیرریلوے مقرر

واضح رہے کہ شیخ رشید نے حکومت بنتے ہی وزارت داخلہ کا قلمدان مانگا تھا لیکن وزیراعظم تجربے کی بنیاد پر شیخ رشید کو وزیر ریلوے بنانے کے خواہشمند تھے۔

وزیراعظم کے سابق معاون خصوصی نعیم الحق نے شیخ رشید کووزارت ریلوے پرمنایا تھاتاہم اب وزیراعظم عمران خان نے شیخ رشید کی دیرینہ خواہش پوری کردی۔