نیب اپوزیشن کو دبانے کا ادارہ بن گیا،حکومت کی کرپشن نظر نہیں آتی ،شاہد خاقان عباسی

کراچی: مسلم لیگ ن کے مرکزی رہنماء اور سابق وزیراعظم شاہد خاقان عباسی نے کہا ہے کہ احتساب کے نام نہاد عمل کو تین سال گذر گئے ہیں،مقدمات کی وجوہات پورا پاکستان جانتا ہے،ہر محکمے میں اربوں کی کرپشن ہورہی ہے،نیب کو حکومت کی کرپشن نظر نہیں آتی ۔

شاہد خاقان عباسی نے احتساب عدالت میں پیشی کے بعد میڈیا سے گفتگوکرتے ہوئے کہا کہ اپوزیشن کیخلاف احتساب کے نام نہاد عمل کو تین سال گذر گئے ہیں،مخالفین کیخلاف مقدمات کی وجوہات پورا پاکستان جانتا ہے،آڈیٹر جنرل کی رپورٹ دیکھیں اربوں کے اسکینڈل موجود ہیں ۔

انہوں نے کہا کہ ہر محکمے میں اربوں کی کرپشن ہورہی ہے،ملک کا کرپٹ ترین ادارہ نیب ہے،نیب کو حکومت کی کرپشن نظر نہیں آتی ،کوئی کالونی یا پراجیکٹ ایسا نہیں جن کے مالکان سے نیب نے کروڑوں روپے وصول نا کئے ہوں،نیب اپوزیشن کو دبانے کا ادارہ بن چکا ہے۔

مزید پڑھیں:افغانستان سے عوام کاانخلاء، مشکلات کے باوجود پاکستان اپنا کردار ادا کررہا ہے۔وزیرِخارجہ

سابق وزیراعظم شاہد خاقان عباسی نے کہا کہ جو لوگ آج نیب کو استعمال کررہے ہیں کل انکو بھی جواب دینا ہوگا،ملک کی خارجہ پالیسی کا کچھ پتہ ہی نہیں،افغانستان سے متعلق فیصلے بند کمروں میں نہیں ہونے چاہئیں۔

افغان پالیسی پارلیمنٹ کی مشترکہ اجلاس میں طے کی جائے۔افغانستان کی جنگ میں پاکستان کا بہت نقصان ہوا ہے،افغانستان کی جنگ میں ہم نے کروڑوں پناہ گزین کو پناہ دی ہے،افغانستان مسئلے پر پارلیمنٹ سے غیر متنازعہ پالیسی بنائی جائے۔

انہوں نے کہا کہ جب تک آئین کے مطابق ملک نہیں چلے گاہم آگے نہیں بڑھ سکتے،حقائق عوام کے سامنے آنے چاہئیں،طے کرلیں کے عوام کی رائے کا احترام کرنا ہے یا الیکشن چوری کرنا ہے،تین سالوں میں حکومت کی نااہلی پر وائٹ پیپر شائع کریں گے۔