سابق وزیر اعظم شہباز شریف کا نواز شریف سے ملاقات کیلئے آج لندن جانے کا فیصلہ

لاہور: سابق وزیر اعظم شہباز شریف نے پارٹی قائد نواز شریف سے ملاقات کیلئے آج لندن جانے کا فیصلہ کیا ہے۔ترجمان ن لیگ مریم اورنگزیب نے تصدیق کردی۔ 

تفصیلات کے مطابق ن لیگ کی ترجمان مریم اورنگزیب نے اپنے ایک بیان میں کہا کہ ن لیگ کے صدر شہباز شریف آج لاہور سے لندن کیلئے روانہ ہوں گے اور برطانیہ میں قیام کے دوران پارٹی قائد نواز شریف سے ملاقات کریں گے۔

یہ بھی پڑھیں: 

مسافر بس میں آتشزدگی، ایک ہی خاندان کے 6افراد سمیت 18 جاں بحق

سابق وزیر اعظم اور پاکستان مسلم لیگ (ن) کے صدر جناب شہباز شریف آج بروز اتوار لاہور سے لندن روانہ ہوں گے۔ لندن میں اپنے قیام کے دوران جناب شہباز شریف پارٹی قائد جناب محمد نواز شریف سے ملاقات بھی کریں گے۔

— Marriyum Aurangzeb (@Marriyum_A) August 20, 2023

دریں اثناء مریم اورنگزیب نے کہا کہ کراچی سے اسلام آباد جانے والی مسافر کوچ کے حادثے پر جتنا بھی افسوس کیا جائے، کم ہے۔ یہ خبر سن کر دل بے حد غمزدہ ہے۔متاثرہ خاندان سے دلی افسوس کا اظہار کرتے ہیں۔ 

کراچی سے اسلام آباد آنے والی مسافر کوچ کے حادثے پر جتنا بھی افسوس کیا جائے، کم ہے۔ یہ خبر سن کر دل بے حد دکھی ہے۔ متاثرہ خاندانوں سے دلی افسوس ہے، ان کی مشکل کی اس گھڑی میں ہم سب شریک ہیں۔ اللہ تعالیٰ مرحومین کو جنت الفردوس میں بلند مقام عطا فرمائے اور تمام غمزدہ خاندانوں کو صبر…

— Marriyum Aurangzeb (@Marriyum_A) August 20, 2023

خیال رہے کہ مسافر کوچ کے حادثے میں 18افراد جاں بحق جبکہ متعدد زخمی ہوئے ہیں جنہیں طبی امداد دی جارہی ہے۔ مریم اورنگزیب نے دعا کرتے ہوئے کہا کہ اللہ تعالیٰ مرحومین کو جنت الفردوس میں بلند مقام عطا فرمائے اور لواحقین کو صبرِ جمیل کی توفیق دے۔ 

قبل ازیں شہرِ قائد سے وفاقی دارالحکومت اسلام آباد جانے والی مسافر بس موٹر وے پر ٹول پلازہ کے قریب تصادم کے نتیجے میں آتشزدگی کا شکار ہوگئی، آتشزدگی کے باعث ایک ہی خاندان کے 6افراد سمیت 18شہری جاں بحق ہو گئے۔

کراچی سے اسلام آباد جاتے ہوئے پنڈی بھٹیاں کے قریب حادثے کا شکار ہونے والی بس سے 16میتوں کو نکال لیا گیا ہے جبکہ بس حادثے کے نتیجے میں 18افراد جھلس کر جاں بحق اور 15زخمی ہوئے۔