آپ کو اپیل کا حق نہیں۔فیصل واؤڈا کی نااہلی کے خلاف درخواست مسترد

اسلام آباد: چیف جسٹس نے سپریم کورٹ میں پی ٹی آئی رہنما فیصل واؤڈا کی تاحیات نااہلی پر حکمِ امتناع کی درخواست مسترد کرتے ہوئے ریمارکس دئیے ہیں کہ آپ کو اپیل کا حق نہیں ہے۔

تفصیلات کے مطابق ملک کی سب سے بڑی عدالت سپریم کورٹ نے فیصل واؤڈا کی تاحیات نااہلی پر حکمِ امتناع دینے کی اور کیس سینیٹ الیکشن سے قبل سننے کی درخواست بھی مسترد کردی۔ چیف جسٹس کا کہنا تھا کہ درخواست گزار کا رویہ ہمارے سامنے ہے۔

یہ بھی پڑھیں:

بلدیاتی انتخابات پر بریفنگ، وزیر اعظم دورے کیلئے لاہور پہنچ گئے

چیف جسٹس عمر عطا بندیال نے تاحیات نااہلی کے خلاف درخواست کی سماعت کے دوران ریمارکس دیتے ہوئے کہا کہ بظاہر فیصل واؤڈا کا جمع کرایا گیا بیانِ حلفی جھوتا تھا۔ کیس کو بہت لٹکایا گیا۔ درخواست گزار نے ووٹ ڈالا اور اس کے بعد مستعفی ہوا۔

درخواست کی سماعت کے دوران دلائل دیتے ہوئے فیصل واؤڈا کے وکیل کا کہنا تھا کہ ہائیکورٹ کی منظوری کے بغیر سزائے موت بھی نہیں دی جاتی۔ الیکشن کمیشن کسی منتخب نمائندے کو تاحیات نااہل کرنے کا اختیار نہیں رکھتا۔

سپریم کورٹ نے ریمارکس دئیے کہ یہ نااہلی کا کیس ہے، سزائے موت کا نہیں۔ الیکشن کمیشن نے فیصل واؤڈا کو جو اختیار استعمال کرتے ہوئے نااہل کیا، اس میں اپیل کا حق نہیں دیاجاتا۔ عدالت واضح کرچکی کہ جھوٹا بیانِ حلفی جمع کرانے کے نتائج سنگین ہونگے۔

سماعت کے دوران چیف جسٹس عمر عطا بندیال نے کہا کہ الیکشن کمیشن منتخب نمائندوں کو تاحیات نااہل کرسکتا ہے یانہیں، اس کا جائزہ لیا جائے گا۔ بعد ازاں تاحیات نااہلی کیس کے خلاف حکمِ امتناع کی درخواست کی سماعت غیر معینہ مدت تک ملتوی کردی گئی۔