سعودی عرب کا بیروت دھماکوں کے بعد لبنانی قوم سے یکجہتی کا اظہار

ریاض:سعودی عرب نے لبنان کے دارالحکومت بیروت میں ہونے والے دھماکوں اور ان میں ہونے والے جانی نقصان پر گہرے دکھ کا اظہار کیا ہے۔

سعودی عرب نے دھماکوں پر لبنانی قوم کے ساتھ مکمل یکجہتی اور ہمدردی کا اظہار کرتے ہوئے کہا ہے کہ دھماکوں کے بعد پیدا ہونے والی صورت حال پر نظر رکھے ہوئے ہیں۔

اس حوالے سے سعودی عرب کی وزارت خارجہ کی طرف سے جاری بیان میں کہا کہ بیروت دھماکوں پر مملکت کو بہت صدمہ پہنچا۔ سعودی عرب مشکل کی اس گھڑی میں لبنانی عوام کے ساتھ اور زخمیوں کی جلد صحت یابی کے لیے دعاگو ہے۔

خیال رہے کہ بیروت میں ایک بندرگاہ کے علاقے میں منگل کی شام مقامی وقت کے مطابق 6 بجےدھماکے ہوئے جس کے نتیجے میں بڑی تعداد میں عمارتیں اور گاڑیاں تباہ ہو گئیں۔

اطلاعات کے مطابق دھماکے اتنے شدید تھے کہ ان کی آواز پڑوسی ملک قبرص میں بھی سنی گئی۔دھماکوں میں اب تک 100 افراد کے ہلاک ہونے کی تصدیق کی گئی ہے جب کہ 4 ہزار سے زائد زخمی ہوئے۔