ڈرامہ سیریل سنگِ ماہ کی عوامی مقبولیت کا راز سامنے آگیا

پاکستانی شوبز انڈسٹری کے معروف اداکاروں سے مزین ڈرامہ سنگِ ماہ کی عوامی مقبولیت کا راز سامنے آگیا ہے۔ ٹی وی سیریل کی تازہ ترین قسط نے بھی مداحوں کے دل جیت لیے ہیں۔

تفصیلات کے مطابق ڈرامہ سیریل سنگِ ماہ کی کاسٹ میں اداکارہ کبریٰ خان، ثانیہ سعید، نعمان اعجاز، میکال ذوالفقار، عاطف اسلم، ہانیہ عامر اور زاویار نعمان شامل ہیں۔

یہ بھی پڑھیں:

ڈرامہ سیریل صنفِ آہن کی نئی قسط نے مداحوں کے دل جیت لیے

نئی قسط نے سوشل میڈیا صارفین کے دل جیت لیے۔ مداحوں کا کہنا ہے کہ گزشتہ شب نشر کی گئی قسط میں ہر منظر کو خوبصورتی سے عکس بند کیا گیا ہے۔

گلوکار کے طور پر شوبز کی دنیا میں قدم رکھنے والے عاطف اسلم نے عوام کو اپنی جاندار اداکاری سے حیران کیا، ڈرامے میں پختون خواہ کی ثقافت بھی نمایاں عنصر ہے۔

تمام اداکاروں کی ڈرامے کی اسکرین پر موجودگی، کہانی کا پلاٹ اور جاندار اداکاری نے ناظرین و سامعین کو سنگِ ماہ کی کہانی منفرد ہونے کا یقین دلا دیا ہے۔

ہر گزرتی ہوئی قسط کے ساتھ ساتھ ناظرین کی ڈرامے میں دلچسپی اور تجسس بڑھ رہا ہے جو ڈرامہ سازوں کے نزدیک کسی بھی ڈرامے کی سب سے بڑی کامیابی سمجھی جاتی ہے۔

مرکزی دھارے کے ساس بہو، شادی طلاق اور احمقانہ رشتے داریوں کی کہانیوں سے ہٹ کر سنگِ ماہ کی منفرد کہانی نے ناظرین کو اسکرین سے منسلک رہنے پر مجبور کیا۔

مداحوں کا کہنا ہے کہ ڈرامے میں دشمنی، دوستی اور محبت کے علاوہ خواتین کا مضبوط کردار اتنی خوبصورتی سے دکھایا گیا ہے جسے نظر انداز نہیں کیاجاسکتا۔

سنگِ ماہ میں مؤثر اور متاثر کن مکالمے بھی ناظرین کو دلچسپی برقرار رکھنے پر مجبور کرتے ہیں، مثلاً ایک عورت کا دل وادیوں سے نہیں، ارادوں سے جیتا جاتا ہے۔

معروف ڈرامہ نگار مصطفیٰ آفریدی نے ڈرامہ سیریل سنگِ ماہ کو اپنی شاعرانہ زبان اور مضبوط پلاٹ کی کہانی دے کر معاشرے کی حقیقی نوعیت کی عکاسی کی جو بے مثال ہے۔