اپوزیشن کی تمام چالوں کو ناکام بنانے کیلئے تیار ہوں، عمران خان

منڈی بہاؤالدین:وزیراعظم عمران خان نے کہا ہے کہ خیبرپختونخوا کے عوام نے پاکستان تحریک انصاف (پی ٹی آئی) کو اس کی اہلیت کی وجہ سے دوبارہ منتخب کیا۔

منڈی بہاؤالدین میں عوامی اجتماع سے خطاب کرتے ہوئے وزیراعظم نے اپوزیشن جماعتوں پر تنقید کرتے ہوئے کہا کہ ڈاکوؤں کے گلدستے میں ایک شخص جسے میں مولانا نہیں کہوں گا، ڈیزل‘ تمام مخالفین کو اکٹھا کرتا ہے اور حکومت مخالف تحریک شروع کرتا ہے۔ انہوں نے مزید کہا کہ اپوزیشن جماعتیں پی ٹی آئی سے خوفزدہ ہیں۔

عمران خان نے اعتراف کیا کہ سابق وزیر اعظم اور پاکستان مسلم لیگ (ن) کے سربراہ نواز شریف کو بیرون ملک سفر کی اجازت دینا سب سے بڑی غلطی تھی۔

وزیراعظم نے کہا کہ نواز شریف کے دو بیٹے مسلم لیگ ن کے دور میں ملک سے فرار ہو گئے جبکہ سابق وزیر خزانہ اسحاق ڈار کے فرار کے لیے شاہد خاقان عباسی نے اپنا طیارہ فراہم کیا۔ وزیر اعظم نے کہا کہ اپوزیشن مجھ پر (این آر او) کے لیے دباؤ ڈال رہی ہے، جیسے مشرف نے دیا تھا۔

عمران خان نے مزید کہا کہ تحریک انصاف کے دور حکومت میں عدلیہ آزاد ہے۔ انہوں نے مزید کہا کہ اب لاٹھیاں پکڑ کر کوئی بھی سپریم کورٹ پر حملہ نہیں کر سکتا۔

مسلم لیگ (ن) کے صدر شہباز شریف کو تنقید کا نشانہ بناتے ہوئے وزیراعظم نے سوال کیا کہ جب آپ کو لگتا ہے کہ آپ بے گناہ ہیں تو آپ کیسز میں توسیع کیوں مانگ رہے ہیں؟ شریف خاندان کے خلاف کرپشن ریفرنسز کی سماعت روزانہ کی بنیاد پر ہونی چاہیے۔

ملک میں بڑھتی ہوئی مہنگائی پر بات کرتے ہوئے عمران خان نے کہا کہ وہ جانتے ہیں کہ بنیادی اشیاء کی قیمتوں میں اضافے سے عوام مشکلات کا شکار ہیں۔ میں ہمیشہ کوشش کرتا ہوں کہ بڑھتی ہوئی مہنگائی پر قابو پانے کے لیے بروقت اقدامات کروں۔ انہوں نے کہا کہ میڈیا بھی عوام کو مہنگائی کی وجوہات سے آگاہ کرنے میں اپنا کردار ادا کرے۔

مزید پڑھیں: وزیراعظم عمران خان کا صحافی اطہر متین کے بے رحمانہ قتل پر گہرے دکھ کا اظہار

وزیر اعظم عمران خان نے سمندر پار پاکستانیوں کو ملک کا اہم اثاثہ بھی قرار دیا۔وزیراعظم عمران خان کا مزید کہنا تھا کہ پہلی بار آزاد خارجہ پالیسی بنائی۔ انہوں نے بتایا کہ اب پاکستان کسی سے ڈکٹیشن نہیں لیتا۔