پنجاب میں گذشتہ 24 گھنٹوں کے دوران 49 مریض انتقال کرگئے، ڈاکٹر یاسمین راشد

لاہور: صوبہ پنجاب کی وزیر صحت ڈاکٹر یاسمین راشد کا کہنا ہے کورونا کیسز میں کمی ضرور آئی ہے مگر کورونا وائرس ختم نہیں ہوا ہے۔ صوبے بھر میں ہفتے اور اتوار کو مکمل لاک ڈاؤن کا نفاذ بدستور جاری رہےگا۔

لاہور میں کورونا وائرس کی موجودہ صورتحال پر پریس کانفرنس کرتے ہوئے وزیر صحت پنجاب ڈاکٹر یاسمین راشد نے کہا ہے کہ کورونا کی وباء میں کمی آئی ہے مگر کورونا کیسز ختم نہیں ہوئے ہیں ۔ اگر ہم سب کورونا ایس او پیز پر مکمل عملدرآمد کریں تو شرح میں مزید کمی آسکتی ہے۔

انہوں نے کہا ہے کہ گذشتہ 24 گھنٹوں کےدوران 403 نئے کیسز رپورٹ ہوئے ہیں جبکہ صوبے بھر میں کورونا کے 49 مریض انتقال کر گئے ہیں۔

ویکسین سے متعلق افواہوں پر گفتگو کرتے ہوئے ڈاکٹر یاسمین راشد کا کہنا تھا کہ ویکسین کا کوئی نقصان نہیں ہے ہم سب نے ویکسین لگوائی ہے۔ عوام ویکسین سے متعلق افواہوں پر کان نہ دھریں۔ کوئی نقصان ہوتا تو دنیا بھر میں ویکسین کیوں لگائی جاتی؟۔

پابندیوں سے متعلق صوبائی وزیر صحت کا کہنا تھا کہ ان ڈور شادیوں پر ابھی بھی پابندی ہے۔ 24 گھنٹے میں ایک لاکھ 80 ہزار افراد کو ویکسین لگا چکے ہیں۔ مثبت کیسز کی شرح میں کمی سختی کے باعث آئی۔

ان کا کہنا تھا کہ ملک میں ویکسین کی کوئی کمی نہیں۔ ہمارے پاس 18 لاکھ خوراکوں کا اسٹاک موجود ہے۔ مزید 30 لاکھ خوراکیں آئندہ چند دنوں میں آرہی ہیں۔

لاک ڈاؤن سے متعلق انہوں نے بتایا کہ رات 8 بجے کے بعد کمرشل سرگرمیوں پر پابندی ہے۔ ہفتہ اور اتوار کو مکمل لاک ڈاؤن کا سلسلہ برقرار ہے۔ لاک ڈاؤن سے دیہاڑی دار طبقے کا بہت نقصان ہو رہا ہے۔