گوگل نیوز پر ہمیں فالو کریںکراچی: وفاقی وزیر اسد عمر نے کہا ہے کہ کے 4 کراچی کے عوام کے لیے انتہائی اہم منصوبہ ہے، سندھ اور کراچی کی عوام سے وعدہ ہے ترجیحی بنیادوں پر کے 4 مکمل کروائیں گے،کراچی کی ترقی کے لیے تمام جماعتوں کے ساتھ مل کر کام کریں گے ، ایم کیو ایم سے کوئی اختلاف نہیں ہے۔
الیکشن سے قبل ہماری بڑی سیاسی شخصیات کہتے تھے کہ لیاری کے اندر کسی بڑی شخصیت کی شمولیت کرائی جائے جس کا بہت بڑا نام ہو اور ہمارا یہ ماننا تھا کہ لیاری تبدیلی کے لیے اس وقت ووٹ دے گا جب اس کو چہرہ بھی تبدیلی کا نظر آئے گا ۔
شکور شاد نے نہ صرف مقابلہ کیا پر بڑے بڑے بتوں کو گراکر دکھایا میری ایک ہفتہ قبل فہمیدہ مرزا سے ملاقات ہوئی تھی انہیں میں نے کہا تھا کہ لیاری کے لیے ہمیں کوئی کھیل کا کوئی منصوبہ دیں تاکہ اسے ہم باقاعدہ اگلے بجٹ میں شامل کراسکے لیاری کے نوجوانوں میں بڑا ٹیلنٹ ہے وہ آگے آکر ملک کا نام روشن کرسکتے ہیں۔
ان خیالات کا اظہار انہوں نے لیاری میں پی ٹی آئی رہنماء غنی اعوان ، جلال بچلانی کی جانب سے قائم کردہ مفت ہسپتال کی افتتاحی تقریب سے خطاب کرتے ہوئے کیا اس موقع پر رکن قومی اسمبلی شکور احمد شاد ، اراکین اسمبلی رمضان گھانچی ، سدرہ عمران ، ڈاکٹر سنجے گنگوانی ، ادیبہ حسن ، عدیل احمد ، سربراہ بیت المال سندھ و سینئر نائب صدر کراچی حنید لاکھانی اور دیگر رہنماء بھی موجود تھے ۔
اسد عمر نے اپنے خطاب میں مزید کہا کہ میری کچھ دن پہلے وزیراعلیٰ سندھ سے ملاقات ہوئی کراچی کے کچھ منصوبوں کے حوالے سے میں نے انہیں کہا تھا اور میڈیا پر بھی کہا کہ جہاں پر عوام کی ترقی ، ترقیاتی منصوبے اور فلاح کے کام میں کوئی سیاست نہیں ہوگی ۔
چاہے وہ کسی بھی جماعت کا ووٹر ہو اگر سیاسی جماعت چاہے وہ کوئی بھی ہو وہ اگر پاکستان کی عوام کی خدمت کریں گے تو ہم ان کے ساتھ ملکر کام کرنے کے لیے تیار ہیں۔
کے فور کا منصوبہ کراچی کی عوام کے لیے انتہائی اہم منصوبہ ہے جس سے 26کروڑ گیلن پانی ہم نے کینجھر سے کراچی لیکر آنا ہے میرا سندھ حکومت اور کراچی کی عوام سے وعدہ ہے کہ اس منصوبے پر مزید خرچ ہونے والی رقم کا پچاس فیصد وفاق سے ہم دلوائیں گے اور اس منصوبے کو جلد سے جلد مکمل کریں گے ۔
پورٹ یہاں سے قریب ہے شہر میں بڑی گاڑیوں کے داخلے سے ٹریفک کا نظام متاثر ہوتا ہے اس لیے لیاری ایکسپریس وے یا نادرن بائے پاس کسی ایک منصوبے کو یہاں تک بڑھایا جائے گا جس سے مقامی لوگوں کو سہولت ملے گی ۔
احساس پروگرام ، کامیاب جوان پروگرام سے نوجوانوں اور خواتین کو زیادہ فائدہ ہوگا سب سے بڑا مسئلہ مہنگائی کا ہے وزیراعظم نے کل بھی میٹنگ کی ہے اس سلسلے میں فروری کے مہینے میں وزیراعظم بڑے فیصلے کرنے جارہے ہیں اسی مہینے میں مہنگائی کی کمر توڑ ڈالیں گے اور فروری میں ہی مصنوعی مہنگائی کرنے والوں کوکڑی سزا دی جائے گی ہمیں اس شہر اور اس شہر کے لوگوں سے پیار ہے اس لیے یہ شہر ہمارا ہے آج ایک حکومت وفاق میں موجود ہے جو اس شہر کو اپنا سمجھتی ہے۔
مزید پڑھیں:بی آر ٹی منصوبہ:شہباز شریف اور پرویز خٹک کے درمیان ٹوئٹر پر لفظی جنگ چھڑ گئی
