خیبر پختونخوا بلدیاتی انتخابات، نیبر ہوڈ کونسلز میں پی ٹی آئی کو شکست

پشاور: حکمراں سیاسی جماعت پاکستان تحریکِ انصاف خیبر پختونخوا بلدیاتی انتخابات کے اہم مرحلے کے دوران نیبر ہوڈ کونسلز میں بھی ہار گئی ہے جبکہ چیئرمین کی زیادہ تر نشستیں آزاد امیدواروں یا پھر جمعیت علمائے اسلام کے نام رہیں۔

تفصیلات کے مطابق خیبر پختونخوا اور وفاق کی حکمراں سیاسی جماعت کو صوبے کے بلدیاتی انتخابات کے دوران بڑے جھٹکے کا سامنا ہے۔ مولانا فضل الرحمان کی جمعیت علمائے اسلام (ف) نے میدان مار لیا۔ جے یو آئی کے 49جنرل کونسلرز چیئرمین بن گئے۔

یہ بھی پڑھیں:

منی بجٹ کی منظوری کا مشن، قومی اسمبلی کا اجلاس آج ہوگا

خیبر پختونخوا میں دوسرے مرحلے کے بلدیاتی انتخابات مارچ میں کرانے کا فیصلہ

خیبر پختونخوا کے دارالحکومت پشاور کی 356ولیج اور نیبر ہوڈ کونسلز کے سرکاری نتائج سامنے آگئے۔ عوامی نیشنل پارٹی 46 نشستوں کے ساتھ دوسرے نمبر پر رہی، پیپلز پارٹی کے پی کے کی تیسری اہم جماعت رہی جبکہ پی ٹی آئی چوتھا نمبر حاصل کرسکی۔

صوبائی دارالحکومت پشاور کے بلدیاتی انتخابات میں نیبر ہوڈ کونسلز کے سب سے زیادہ 143 آزاد امیدوار چیئرمین بن گئے جسے تحریکِ انصاف کی جے یو آئی اور پی پی پی سمیت دیگر پارٹیوں کے خلاف ہوم گراؤنڈ پر بڑی شکست قرار دیا جارہا ہے۔ 

یاد رہے کہ اس سے قبل الیکشن کمیشن آف پاکستان نے خیبر پختونخوا میں دوسرے مرحلے کے بلدیاتی انتخابات مارچ میں کرانے کا فیصلہ کیا۔پہلے مرحلے کے انتخابات گزشتہ برس دسمبر کے دوران ہوئے جن میں تحریکِ انصاف شکست کھا گئی تھی۔

 صوبہ خیبر پختونخوا میں پہلے مرحلے کے بلدیاتی انتخابات 19 دسمبر کو ہوئے جن میں پی ٹی آئی خاطرخواہ نشستیں حاصل کرنے میں کامیاب نہ ہوسکی۔ الیکشن کمیشن نے موسم کی شدت کے پیشِ نظر دوسرے مرحلے کے انتخابات مارچ میں کرانے کا فیصلہ کیا۔