جی ڈی اے اور پی ٹی آئی دونوں جماعتیں ساتھ کھڑی ہیں، گورنر سندھ

کراچی: گورنر سندھ عمران اسماعیل کا کہنا ہے کہ گرینڈ ڈیموکریٹک الائنس (جی ڈے اے) اور پاکستان تحریک انصاف (پی ٹی آئی ) ساتھ ہیں اور مضبوطی سے کھڑے ہیں، سندھ کی تقسیم ہمارے منشور میں شامل نہیں ہے۔

کراچی میں گرینڈ ڈیموکریٹک الائنس کے رہنماؤں کے ہمراہ پریس کانفرنس کرتے ہوئے گورنر سندھ عمران اسماعیل نے کہا کہ میں یہاں کسی کو منانے نہیں آیا کیونکہ کوئی روٹھا نہیں ہے، سندھ کی گیس کے جائز حق کے لیے صوبے کے عوام کے ساتھ کھڑا ہوں۔

گورنر سندھ عمران اسماعیل کاکہنا تھا کہ میری کوشش ہے کہ وزیراعظم جو مزید پیکیج بنارہے ہیں وہ پورے سندھ پر محیط ہو، وزیراعظم عمران خان نے وفاقی وزیر کو اس حوالے سے نظرثانی کی ہدایت کی ہے۔

انہوں نے کہا کہ یہ بات میں کئی بار واضح کرچکا ہوں کہ پاکستان میں مزید صوبوں کی ضرورت ہے لیکن وہاں ہے جہاں کے لوگ ایسا چاہتے اور سمجھتے ہیں، سندھ ایک ایسا صوبہ ہے جہاں کوئی تقسیم قبول نہیں ہے۔

عمران اسماعیل کا کہنا تھا کہ جب سندھ کی بات ہوتی ہے توسندھ کے عوام کی بات ہوتی ہےاور عوام کی خواہش ہے کہ سندھ ایک تھا، ایک ہے اور رہے گا، ہم سندھ کے ساتھ کھڑے ہیں، ہم سندھ کے بیٹے ہیں ہم ایسے کیسے بات کرسکتے ہیں کہ اپنے سندھ کو تقسیم کردیں۔

یہ بھی پڑھیں: غلام سرور خان نے اسلام آباد میں 4 سالہ بچی کی ہلاکت پر رپورٹ طلب کر لی

ایم کیو ایم کی جانب سےسندھ اسمبلی میں سندھ کی تقسیم سے متعلق بل کے حوالے سے گورنر سندھ کا کہنا تھا کہ سندھ کی تقسیم ہمارے منشور میں شامل نہیں ہے باقی جو اسمبلی کی بات ہے وہ اسمبلی والے جانیں۔

گورنر سندھ نے کہا کہ ڈیڑھ سال کی حکومت سے پچھلے 70 سال کا حساب نہ مانگیں پہلے دیکھیں کہ ملک کے ساتھ کیا ہوا ہے؟ کس نے غلط کیا ہے؟، 1960 اور 70 کی دہائی کے بعد سے ملک نیچے آیا ہے اس کا ذمہ دار کوئی تو ہوگا؟۔

گورنر عمران اسماعیل نے کہا کہ محدود وسائل کے باوجود وزیراعظم نے سندھ کے لیے سب سے زیادہ فنڈز مختص کیے ان پر عملدرآمد اپنا ٹائم لیتی ہے، ڈیڑھ سال میں پورا سندھ تبدیل نہیں ہوسکتا اس میں وقت لگے گا۔