پاکستان اسٹاک مارکیٹ میں 46پوائنٹس کا اضافہ

کراچی: پاکستان اسٹاک مارکیٹ میں آج کاروباری ہفتے کے آخری روز کے ایس ای 100 انڈیکس میں 46 پوائنٹس کا اضافہ ریکارڈ کیا گیا ہے۔ مارکیٹ نے کاروبار کا اختتام مثبت انداز میں کیا۔

تفصیلات کے مطابق جمعۃ المبارک کے روز اسٹاک مارکیٹ میں سرمایہ کاروں نے مجموعی طور پر مثبت روئیے کا مظاہرہ کیا۔ امریکی ڈالر کےمقابلے میں روپے کی قدر میں اضافے اور سونے کے سستا ہونے کا بھی کے ایس ای 100 انڈیکس پر مثبت اثر مرتب ہوا۔

یہ بھی پڑھیں:

ملک بھر میں سونے کی قیمت میں کمی، ڈالر کے مقابلے میں روپے کی قدر میں اضافہ

آج کاروباری ہفتے کے آخری روز کے ایس ای 100 انڈیکس میں کاروبار آغاز سے ہی مثبت رہا۔ مارکیٹ میں کاروباری اوقات کے دوران ایک مرحلے پر 48 پوائنٹس کی کمی بھی ریکارڈ کی گئی تاہم بعد ازاں شیئرز کی خریداری میں تیزی کا رجحان دیکھنے میں آیا۔

کے ایس ای 100 انڈیکس میں کاروبار کے دوران کم ترین سطح 45 ہزار 814 اعشاریہ 64 جبکہ زیادہ سے زیادہ 46 ہزار 133 اعشاریہ 20 پوائنٹس رہی۔ کاروباری اوقات کے اختتام پر کاروبار 46 اعشاریہ 72 پوائنٹس کا اضافہ ریکارڈ کیا گیا۔

پاکستان اسٹاک مارکیٹ میں کے ایس ای 100 انڈیکس 45 ہزار 909 اعشاریہ 65 پوائنٹس کی سطح پر بند ہوا۔ 360 کمپنیوں کے حصص کا کاروبار ہوا جن میں سے 158 حصص کے نرخ میں اضافہ، 178 کے بھاؤ میں کمی جبکہ 24 میں استحکام رہا۔