یونیورسٹیوں میں انجینئرز کو مارکیٹ کی طلب کے تحت تعلیم دی جانی چاہیے، صدر مملکت

اسلام آباد:صدر مملکت عارف علوی نے کہاہے کہ یونیورسٹیوں میں انجینئرز کو مارکیٹ کی طلب کے تحت تعلیم دی جانی چاہیے۔
دوسری بین الاقوامی انجینئرنگ ایجوکیشن کانفرنس سے خطاب کرتے ہوئے صدر ڈاکٹر عارف علوی نے کہاکہ پاکستان میں 100سے زائد یونیورسٹیاں انجینئرنگ کی تعلیم دے رہی ہیں۔
صدر مملکت نے کہاکہ یونیورسٹیوں میں انجینئرز کو مارکیٹ کی طلب کے تحت تعلیم دی جانی چاہیے۔ انہوں نے کہاکہ پاکستان کو توانائی میں خودکفیل بنانے کیلئے انجینئرز اپنا کردار ادا کریں۔
انہوں نے کہاکہ انجینئرز اور ڈاکٹرز کی تعلیم پر ملک کا خطیر سرمایہ خرچ ہوتا ہے۔صدر ڈاکٹر عارف علوی نے کہاکہ پاکستان میں پانی کا ضیاع روک کر اسے استعمال کیلئے محفوظ کرنے کی ضرورت ہے۔
انہوںنے کہاکہ پاکستان میں سیوریج کا ساڑھے 4سو ملین گیلن پانی سمندر میں پھینکا جا رہا ہے۔صدر مملکت نے کہاکہ دنیا میں سائنسی اعتبار سے بے شمار تبدیلیاں رونما ہورہی ہیں،دنیا میں وہی قومیں کامیاب ہونگی جو خود کو تبدیلی سے ہم آہنگ کریں گی۔
صدر مملکت نے کہاکہ معاشرے میں معاشی بے ضابطگیوں کو ختم کرنا ترجیح ہونی چاہیے،اداروں میں انجینئرز کی پروموشن کے حوالے سے لائحہ عمل طے کیا جانا چاہیے۔