سینیٹر کی خالی نشست پر پیپلزپارٹی کے نثار کھوڑو سینیٹر منتخب ہوگئے

کراچی: پاکستان پیپلز پارٹی (پی پی پی) کے رہنما نثار احمد کھوڑو سندھ سے اس نشست پر سینیٹر منتخب ہوگئے جو پاکستان تحریک انصاف (پی ٹی آئی) کے رہنما فیصل واوڈا کی نااہلی کے بعد خالی ہوئی تھی۔

بدھ کو سندھ اسمبلی کی عمارت میں پولنگ ہوئی اور بغیر کسی وقفے کے شام 4 بجے تک جاری رہی۔ غیر سرکاری نتائج کے مطابق نثار کھوڑو نے 101 میں سے 99 ووٹ حاصل کرکے کامیابی حاصل کی جب کہ دو ووٹ مسترد ہوئے۔

اگرچہ پاکستان تحریک انصاف (پی ٹی آئی) کے آغا ارسلان نے اس نشست کے لیے کاغذات نامزدگی جمع کرائے تھے، تاہم پی ٹی آئی اور اس کے اتحادیوں نے انتخابات کے بائیکاٹ کا اعلان کیا تھا۔ بائیکاٹ کے باوجود پی ٹی آئی کے دو ایم پی ایز نے پیپلزپارٹی کے امیدوار نثار کھوڑو کو ووٹ دیا۔

نثار کھوڑو کی جیت کے اعلان کے فوراً بعد پیپلز پارٹی کے چیئرمین بلاول بھٹو زرداری نے پارٹی کے سینئر رکن کو مبارکباد دینے کے لیے ٹویٹر کا سہارا لیا، بلاول نے لکھا ”مبارک ہو، سینیٹر منتخب نثار احمد کھوڑو۔

ایک دن پہلے، پی ٹی آئی کے سندھ کے صدر اور میری ٹائم امور کے وزیر علی زیدی نے ٹویٹ کیا، ”پی ٹی آئی کی زیرقیادت اپوزیشن کل [9 مارچ] کو سندھ اسمبلی میں فیصل واوڈا کی نااہلی کی وجہ سے خالی ہونے والی نشست پر سینیٹ الیکشن کا بائیکاٹ کرے گی۔”

9 فروری کو، الیکشن کمیشن آف پاکستان نے 2018 کے عام انتخابات کے دوران اپنی غیر ملکی شہریت چھپانے پر آئین کے آرٹیکل 62(1)(f) کے تحت فیصل واوڈا کو تاحیات نااہل قرار دے دیا تھا۔

مزید پڑھیں: پہلا ٹارگٹ زرداری،یہ مافیا سندھ کے عوام کے ساتھ ظلم کر رہا ہے، وزیر اعظم

چیف الیکشن کمشنر فیصل سلطان راجہ کی سربراہی میں الیکشن کمیشن کے ایک بینچ نے واوڈا کو نااہل قرار دیا تھا اور ان سے کہا تھا کہ وہ دو ماہ میں بطور وزیر اور رکن قومی اسمبلی حاصل کی گئی تنخواہ اور دیگر مراعات واپس کریں۔ انہیں سینیٹر کی حیثیت سے بھی ڈی نوٹیفائی کیا گیا تھا۔