گوگل نیوز پر ہمیں فالو کریںصوبہ پنجاب کے ضلع بہاولنگر میں غسل خانے کی کھڑکی میں فون داخل کرکے ویڈیو بناتے ہوئے پکڑے جانے والے پولیس اہلکار کو معطل کردیا گیا ہے۔
تفصیلات کے مطابق پولیس اہلکار کو مشتعل علاقہ مکینوں نے ایک گھر کے غسل خانے کی کھلی کھڑکی سے موبائل فون ڈال کر خاتون کی نازیبا ویڈیو بناتے ہوئے رنگے ہاتھوں پکڑلیا اور خوب مارپیٹ کی۔
بعد ازاں مشتعل عوام نے اہلکار کو پولیس کے حوالے کردیا۔ اس حوالے سے بہاولنگر پولیس کا کہنا ہے کہ مذکورہ اہلکار کو گرفتاری کے بعد عہدے سے معطل کردیا گیا ہے جبکہ واقعے کا مقدمہ فورٹ عباس تھانے میں درج ہے۔
قبل ازیں اس واقعے کی ویڈیو سوشل میڈیا پر وائرل ہوگئی جس میں پولیس اہلکار ایک غسل خانے میں موبائل فون داخل کرتے اور ویڈیو ریکارڈنگ کے دوران مشکوک انداز میں ادھر ادھر دیکھتے ہوئے نظر آیا۔
واقعے کی دوسری ویڈیو میں عوام کے ہاتھوں مارپیٹ کا نشانہ بننے والا پولیس اہلکار زخمی ہونے کے بعد کراہتے ہوئے نظر آیا۔ ایک اور پولیس اہلکار ملزم کا فون چیک کرتا ہے جس میں خاتون کی ویڈیو بنائی گئی۔
قبل ازیں ڈی جی نادرا سندھ نے خواتین کو نازیبا پیغامات بھیجنے پر ایکشن لیتے ہوئے نادرا کے اہلکار کو ملازمت سے برطرف کردیا تھا۔
ایک خاتون کے شوہر نے نادرا رجسٹریشن ایگزیکٹو کی جانب سے نازیبا پیغامات بھیجنے کی شکایت کی تھی۔ ڈی جی نادرا سندھ میر عجم درانی کا 4 ماہ قبل کہنا تھا کہ برطرف ملازم نادرا میگا سینٹر، سیمنس چورنگی پر تعینات تھا۔
مزید پڑھیں: نادرا سندھ کا ایکشن، خواتین کو نازیبا پیغامات بھیجنے والا ملازم برطرف
