سہراب گوٹھ میں پولیس سے مقابلہ، دو ملزمان گرفتار، اسلحہ برآمد

کراچی : سہراب گوٹھ تھانے کی حدود میں ڈاکوؤں کا پولیس سے مقابلہ ، دو ملزمان پکڑے گئے، اسلحہ، موٹرسائیکل اور نقدی برآمد کرلی گئی۔

سہراب گوٹھ تھانے کی حدود میں گشت پر مامور پولیس موبائل نے موٹرسائیکل سوار کو رکنے کا اشارہ کیا لیکن موٹرسائیکل پر سوار ملزمان نے پولیس کو دیکھتے ہی گاڑی بھگانے کی کوشش کی ۔

پولیس کے تعاقب کرنے پر ملزمان نے فائرنگ شروع کردی ،پولیس کی جوابی فائرنگ سے ایک ملزم زخمی ہوگیا جس کے بعد پولیس نے دونوں ملزمان کو اسلحہ سمیت رنگے ہاتھوں گرفتار کرلیا۔

مزید پڑھیں:سی ٹی ڈی کی کارروائی، سیکورٹی اداروں پر حملوں میں ملوث 4دہشت گردگرفتار

ایس ایچ او سہراب گوٹھ ریاض احمد بھٹو کے مطابق گرفتار ملزمان کے قبضے سے ایک ٹی ٹی پستول بغیر نمبر پلیٹ موٹرسائیکل 65 ہزار روپے نقد اور دو موبائل فونز برآمد کیا گیا ہے۔

شان احمد ولد محمد شفیع زخمی حالت میں گرفتار جبکہ اس کا ساتھی عمر حیات ولد الله یار بھی گرفتار ہے۔ پولیس نے گرفتار ملزمان کے خلاف ایف آئی آر نمبر 843/2020 بجرم دفعہ 353/324/34R/W 7ATA کے تحت مقدمہ درج کردیا ہے،گرفتار ملزمان کا مزید کرمنل ریکارڈ چیک کیا جارہا ہے۔