مسلم لیگ ق کے رہنما مونس الٰہی لندن روانہ ہو گئے

اسلام آباد: وفاقی وزیر برائے آبی وسائل اور پاکستان مسلم لیگ (ق) کے رہنما مونس الٰہی لندن پہنچ گئے۔

مونس الٰہی جمعرات کو اسلام آباد انٹرنیشنل ایئرپورٹ سے برٹش ایئرویز کی پرواز BA 260 کے ذریعے لندن کے لیے روانہ ہوئے۔ اُن کا کہنا تھا کہ وہ نجی دورے پر لندن آئے ہیں، اور اگر کوئی ملاقات ہوئی تو میڈیا کو آگاہ کریں گے۔

انہوں نے مزید کہا کہ وہ تین چار دن میں واپس آجائیں گے۔ مونس الٰہی نے کہا کہ وہ مرکز اور پنجاب میں پی ٹی آئی کی زیر قیادت حکومت کے اتحادی ہیں جبکہ مستقبل کے حوالے سے فیصلے پرویز الٰہی کریں گے۔

واضح رہے کہ اس ہفتے کے شروع میں پنجاب اسمبلی کے اسپیکر چوہدری پرویز الٰہی نے واضح کیا تھا کہ مسلم لیگ (ق) نے نہ تو موجودہ اتحاد چھوڑا ہے اور نہ ہی وہ اپوزیشن میں شامل ہوئی ہے۔ انہوں نے کہا کہ وزیراعظم عمران خان ایماندار اور نیک نیت ہیں۔

ایک دن پہلے، قومی احتساب بیورو (نیب) نے کہا کہ مونس الٰہی کی گرفتاری کا سوال ہی پیدا نہیں ہوتا، اینٹی گرافٹ واچ ڈاگ کے ترجمان کے مطابق، مونس الٰہی کے خلاف فی الحال کوئی انکوائری زیر التوا نہیں، انہوں نے مزید کہا کہ اس سلسلے میں نیب نے بھی گزشتہ روز وضاحت جاری کی تھی۔

انہوں نے واضح کیا کہ نیب کا تحریک عدم اعتماد سے کوئی تعلق نہیں اور ادارہ ہمیشہ آئین اور قانون کے مطابق اپنی ذمہ داریاں ادا کرنے پر یقین رکھتا ہے۔

مزید پڑھیں: تحریک انصاف کے منحرف ارکان اسمبلی کی ڈرامائی کہانی

ترجمان نے مزید کہا کہ نیب کا تعلق کسی سیاسی جماعت، گروہ یا فرد سے نہیں بلکہ ریاست پاکستان سے ہے۔ نیب کے کسی اہلکار کا عدم اعتماد کی تحریک سے کوئی تعلق نہیں اور نہ کبھی ہوگا۔