وزیر اعظم کا لاپتہ افراد کے معاملے پر بلوچ عوام کے ساتھ مل کر آواز اٹھانیکا اعلان

کوئٹہ: وزیر اعظم پاکستان میاں شہباز شریف نے لاپتہ افراد کے معاملے پر بلوچ عوام کے ساتھ مل کر آواز اٹھانے کا اعلان کرتے ہوئے کہا ہے کہ اگر لاپتہ افراد کامسئلہ قانون کے مطابق حل نہ ہوا تو احساسِ محرومی ختم نہیں ہوگا۔

تفصیلات کے مطابق کوئٹہ میں خضدار کچلاک قومی شاہراہ کے سیکشن کا سنگِ بنیاد رکھنے کی تقریب سے خطاب کے دوران وزیر اعظم شہباز شریف نے کہا کہ ہماری اتحادی حکومت اتفاق اور یکجہتی سے دہشت گردی کو ایک بار پھر شکست دے گی۔ بلوچستان کے مسائل حل کرنے کیلئے بھی اتفاق اور اتحاد سے آگے بڑھنا ہے۔

یہ بھی پڑھیں:

وزیراعظم شہباز شریف کوئٹہ پہنچ گئے، وزیراعلیٰ بلوچستان کا استقبال 

تقریب سے خطاب کرتے ہوئے وزیر اعظم شہباز شریف نے کہا کہ کیا قوم ہمیشہ ماضی میں ہی جھانکتی رہے گی یا کبھی ہم اتفاق اور اتحاد سے آگے بھی بڑھ سکیں گے؟ بلوچستان میں بڑے بڑے اربوں کے منصوبے بند پڑے ہوئے ہیں، یہاں پن بجلی کے منصوبے لگائے جاسکتے ہیں۔ صوبے کے تمام مسائل حل کرنا ہماری کوشش ہوگی۔

خطاب کے دوران وزیراعظم نے کہا کہ کوئٹہ کراچی کی شاہراہ کو خوشحالی کی سڑک بنایا جائے گا، اس میں تاخیر نہیں کی جائے گی۔ ڈیڑھ سال میں کراچی سے چمن تک شاہراہ بھی مکمل کرنی ہے۔ تعمیراتی منصوبے میں سست روی برداشت نہیں کریں گے۔ حکومت کی آئینی مدت ڈیڑھ سال ہے۔

وزیر اعظم شہباز شریف نے کہا کہ کوئٹہ میں میٹرو بس کی فزیبلٹی رپورٹ سامنے لائی جائے۔ بلوچستان کو ملک کی مایہ ناز ٹیکنیکل یونیورسٹی کا تحفہ دیا جائے گا۔ غربت میں کمی لانے کیلئے 5 لاکھ خاندانوں کو فائدہ پہنچانے والا پروگرام شروع کیا جائے گا۔ بلوچستان کے ہونہار طلبہ و طالبات میں لیپ ٹاپ بھی تقسیم کیے جائیں گے۔