دورۂ سعودی عرب مکمل، وزیر اعظم اماراتی ولی عہد سے ملاقات کے بعد وطن واپس پہنچ گئے

اسلام آباد: وزیر اعظم شہباز شریف دورۂ سعودی عرب کی تکمیل اور متحدہ عرب امارات میں ابو ظہبی کے مختصر قیام کے بعد وطن واپس پہنچ گئے ہیں۔پاکستان آمد سے قبل وزیر اعظم نے اماراتی ولی عہد شیخ محمد بن زید النہیان سے ملاقات کی۔ 

تفصیلات کے مطابق وزیر اعظم سعودی عرب کا 3 روزہ دورہ اور عمرے کی ادائیگی کی تکمیل کے بعد وطن واپس پہنچ گئے ہیں۔ پاکستان آمد سے قبل وزیر اعظم نے ابوظہبی میں مختصر قیام کیا۔ دورۂ سعودی عرب کے دوران وزیر اعظم نے روضۂ رسول ﷺ پر بھی حاضری دی۔

یہ بھی پڑھیں:

صدر مملکت نے گورنر پنجاب کو ہٹانے کی وزیر اعظم کی سمری واپس بھیج دی

قبل ازیں جدہ میں وزیر اعظم میاں شہباز شریف نے سعودی ولی عہد شہزادہ محمد بن سلمان سے ملاقات کی اور ابوظہبی میں مختصر قیام کے دوران اماراتی ولی عہد شیخ محمد بن زید النہیان سے بھی ملاقات ہوئی جس کے دوران پاکستان اور متحدہ عرب امارات کے مابین دو طرفہ تعلقات پر گفتگو ہوئی۔

سعودی عرب میں شہزادہ محمد بن سلمان سے ملاقات کے دوران وزیر اعظم نے پاکستان اور سعودی عرب کے دو طرفہ تعلقات، حج اور عمرہ کے معاملات سمیت دیگر باہمی دلچسپی کے امور پر تبادلۂ خیال کیا۔ دورۂ سعودی عرب کی تکمیل کے بعد وزیر اعظم ابوظہبی کیلئے روانہ ہو گئے تھے۔ 

اس سے قبل مکہ مکرمہ اور مدینہ منورہ میں وزیر اعظم نے عمرے کی ادائیگی مکمل کی جس میں کعبۃ اللہ کا طواف اور حجرِ اسود کو بوسہ دینا شامل تھا۔ دورۂ سعودی عرب کے موقعے پر وزیر اعظم کو سعودی فوج کی جانب سے گارڈ آف آنرز بھی پیش کیا گیا۔ پاکستا ن اور سعودی عر ب کے مابین مذہبی و ثقافتی بنیادوں پر گہرے تعلقات ہیں۔