ملک کا 75واں یومِ آزادی، وزیر اعظم کی شاندار تقریبات کیلئے اداروں کو مبارکباد

اسلام آباد: وزیر اعظم شہباز شریف نے پاکستان کے 75ویں یومِ آزادی کی مناسبت سے شاندار تقریبات منعقد کرنے پر متعلقہ وزارت اور اداروں کو مبارکباد دی ہے۔

سماجی رابطے کی ویب سائٹ ٹوئٹر پر اپنے پیغام میں گزشتہ شب وزیر اعظم شہباز شریف نے کہا کہ پاکستان کے 75ویں یومِ آزادی کے حوالے سے شاندار تقریبات منعقد کرنے پر میں متعلقہ تمام اداروں کو مبارکباد دیتا ہوں۔

یہ بھی پڑھیں:

پاکستان کا قیام معجزے سے کم نہیں تھا۔ وزیر اعظم

وزیر اعظم نے مریم اورنگزیب کی قیادت میں وزارتِ اطلاعات و نشریات، پاک فوج کے شعبۂ تعلقاتِ عامہ (آئی ایس پی آر) اور متعلقہ تمام اداروں کو جشنِ آزادی کی تقریبات کامیابی سے منعقد کرنے پر خراجِ تحسین پیش کیا۔

پاکستان کے 75ویں یومِ آزادی کےحوالے سےشاندار تقریبات منعقد کرنے پرمیں مریم اورنگزیب کی قیادت میں وزارتِ اطلاعات و نشریات،ISPR اورمتعلقہ تمام اداروں کومبارکباد پیش کرتاہوں.زندہ قومیں اپنی نوجوان نسل کواپنی پہچان بھولنےنہیں دیتیں،اور آج کےتاریخی دن آپ سب نےمل کراس بات کویقینی بنایا

— Shehbaz Sharif (@CMShehbaz) August 14, 2022

اپنے ٹوئٹر پیغام میں وزیر اعظم شہباز شریف کا اداروں کی خدمات کو سراہتے ہوئے کہنا تھا کہ زندہ قومیں اپنی نوجوان نسل کو اپنی پہچان بھولنے نہیں دیتیں اور آج کے تاریخی دن آپ سب نے مل کر اس بات کو یقینی بنایا۔

خیال رہے کہ گزشتہ روز پاکستان کی ڈائمنڈ جوبلی سالگرہ کے موقعے پر پرچم کشائی کی مرکزی تقریب کنونشن سینٹر اسلام آباد میں منعقد ہوئی جس سے وزیر اعظم نے خطاب کیا۔ وزیر اعظم کا کہنا تھا کہ پاکستان کا قیام معجزے سے کم نہیں تھا۔

تقریب سے خطاب کے دوران وزیر اعظم نے کہا کہ ملک کی تعمیر و ترقی کیلئے بیرونِ ملک مقیم پاکستانیوں کے کردار کی تعریف کرتا ہوں۔ ملک کا 75واں یومِ آزادی پاکستانی قوم کیلئے تاریخی اہمیت کا حامل ہے۔