گوگل نیوز پر ہمیں فالو کریںاسلام آباد: وزیر اعظم عمران خان نے مٹیاری تا لاہور الیکٹرک ٹرانسمشن لائن کا افتتاح کردیا جس کا مقصد لائن لاسز پر قابو پانا ہے۔
تفصیلات کے مطابق وفاقی دارالحکومت اسلام آباد میں مٹیاری تا لاہور الیکٹرک ٹرانسمیشن لائن کی افتتاحی تقریب سے خطاب کرتے ہوئے وزیر اعظم عمران خان نے کہا کہ سپلائی چین متاثر ہونے کے باعث مہنگائی پیدا ہوئی جو عارضی ہے۔
افتتاحی تقریب سے خطاب کے دوران وزیر اعظم عمران خان نے کہا کہ مہنگائی پر جلد قابو پائیں گے جبکہ قرض ادا کرنے کیلئے ملک کی آمدنی میں اضافہ ضروری ہے۔ کورونا کے باعث ہونے والے مسائل کے دوران بھی سی پیک پر کام ہورہا ہے۔
وزیر اعظم عمران خان نے کہا کہ بوسیدہ ٹرانسمشن لائنز کے باعث لاسز زیادہ ہوتے ہیں جبکہ وزیرِ توانائی نے بھی تقریب سے خطاب کیا۔ حماد اظہر نے کہا کہ سی پیک کے دیگر منصوبوں کا کام تیزی سے مکمل کریں گے جو ملکی معیشت کا اہم ستون ہے۔
خیال رہے کہ اِس سے قبل وزیراعظم نے کہا کہ جو حکومت الیکشن کا سوچتی ہے وہ صوبے کیلئے کچھ نہیں کرتی، بلوچستان کے سیاسی لوگ بھی قصوروار ہیں جو صرف اپنے حلقے کا سوچتے ہیں، صوبے کی ترقی پاکستان کی ترقی کو فائدہ پہنچائے گی۔
گزشتہ روز وزیراعظم نے جھل جھاؤبیلہ شاہراہ کی اپ گریڈیشن کا سنگ بنیاد رکھ دیا، اس موقع پر خطاب کرتے ہوئے انہوں نے کہا کہ ماضی میں سڑکوں کی تعمیر میں بدعنوانی کی گئی،گزشتہ دور میں سڑکوں کی تعمیر میں کرپشن کی تحقیقات کا کہا، ماضی کی نسبت 20 کروڑ کم لاگت میں شاہراہوں کی تعمیر جاری ہے۔
مزید پڑھیں: الیکشن کا سوچنے والی حکومت بلوچستان کیلئے کچھ نہیں کرتی، وزیراعظم
