وزیراعظم کی نوازشریف کوعلاج کی بہترین سہولیات فراہم کرنے کی ہدایت

وزیراعظم عمران خان نے وزیراعلیٰ پنجاب کوہدایت کی ہے کہ سابق وزیراعظم اورقائد مسلم لیگ ن میاں نوازشریف کو علاج کی بہترین سہولیات فراہم کی جائیں۔

وزیر اعظم کی معاون خصوصی برائے اطلاعات و نشریات فردوس عاشق اعوان کا سماجی رابطوں کی ویب سائٹ ٹوئٹر پر اپنے پیغام میں کہناتھا کہ وزیراعظم عمران خان نے نواز شریف کی صحت سے متعلق پنجاب حکومت سے تفصیلات طلب کرلی ہیں ۔

عمران خان نے نواز شریف کی جلد از جلد صحتیابی کے لیے دعا کی اور ان کے لیے نیک تمناؤں کا اظہار کیااور متعلقہ حکام کو ہدایت دی ہیں کہ نواز شریف کو ان کے خاندان کے افراد کی منشاء کے مطابق علاج معالجے کی بہترین سہولیات فراہم کی جائیں۔

وزیراعظم عمران خان نے محمد نواز شریف کی صحت کے متعلق پنجاب حکومت سے تفصیلات طلب کی ہیں۔متعلقہ حکام کو ہدایت دی ہیں کہ ان کے خاندان کے افراد کی منشاء کے مطابق انھیں علاج معالجے کی بہترین سہولیات فراہم کی جائیں۔وزیراعظم کی ان کی صحت یابی کیلئے دعا اور نیک تمناؤں کا اظہار۔

— Firdous Ashiq Awan (@Dr_FirdousPTI) October 23, 2019

دوسری جانب وزیراعظم عمران خان نےوزیراعلیٰ پنجاب سردار عثمان بزدارکو ٹیلی فون کیا۔وزیراعظم عمران خان نے وزیراعلیٰ پنجاب کو میاں نواز شریف کے علاج معالجے سے متعلق ضروری ہدایات دیں۔

وزیراعلیٰ عثمان بزدار نے وزیراعظم عمران خان کو میاں نوازشریف کے علاج سے متعلق اقدامات سے آگاہ کیا۔وزیراعلیٰ نے بتایا کہ وہ میاں نوازشریف کی صحت کے حوالے سے محکمہ صحت کے حکام اور اسپتال انتظامیہ سے رابطے میں ہیں۔ ہرطرح کی طبی سہولتوں کی فراہمی یقینی بنائی جارہی ہے۔

گذشتہ روز وزیر اعلیٰ پنجاب عثمان بزدار نے بھی سابق وزیراعظم نواز شریف کو علاج معالجے کی بہترین سہولتیں فراہم کرنے کی ہدایت کی تھی،سردار عثمان بزدار نے سروسز اسپتال کی انتظامیہ کو نواز شریف کو بہترین علاج معالجہ یقینی بنانے کی ہدایت کرتے ہوئے کہا ہے کہ علاج کے حوالے سے سابق وزیر اعظم کے ذاتی معالج سے بھی مشاورت کی جائے۔