بھارت میں پٹرولیم مصنوعات کی قیمتوں میں ہوشربا اضافہ، عوام سراپا احتجاج

نئی دہلی: ہمسایہ ملک بھارت میں پٹرولیم مصنوعات کی قیمتوں میں ہوش ربا اضافہ ہوا جس پر بھارتی شہریوں نے مودی حکومت کو آڑے ہاتھوں لے لیا۔عوام کا کہنا ہے کہ عالمی سطح پر چین اور پاکستان کے ہاتھوں رسوائی کا سامنا کرنے والی بھارتی سرکار مہنگائی کے طوفان کو بھی کنٹرول نہیں کرسکی۔

تفصیلات کے مطابق عالمی منڈی میں برطانوی و امریکی خام تیل کی قیمتوں میں اتار چڑھاؤ کے دوران بھارت میں پٹرول اور ڈیزل کی قیمتیں بڑھ گئیں۔ ہفتے کو مسلسل تیسرے روز پٹرولیم مصنوعات کی قیمتوں میں 35 روپے فی لٹر تک اضافہ کردیا گیا۔

یہ بھی پڑھیں:

پاکستان میں پٹرولیم مصنوعات کی قیمتوں میں اضافہ، حکومت کی وضاحت

پاکستان میں پٹرولیم مصنوعات اور اشیائے ضروریہ مہنگی کیوں ہوئیں؟

دہلی میں پٹرول 105 روپے 49 پیسے جبکہ ڈیزل 94 روپے 22پیسے لٹر فروخت ہونے لگا۔ ممبئی میں پٹرول 111روپے 43 پیسے، چنئی میں 102 روپے 70 پیسے، کلکتہ میں 106 روپے 10 پیسے لٹر فروخت کیا جانے لگا۔

ممبئی میں ڈیزل کی قیمت 102 روپے 15 پیسے، چنئی میں 98 روپے 59 پیسے، کلکتہ میں 97 روپے 33 پیسے لٹر ہوگئی۔ قبل ازیں پیر کے روز مسلسل 7ویں دن پٹرول کی قیمت میں 30 پیسے جبکہ ڈیزل کی قیمت میں 35پیسے اضافہ ہوا تھا۔

مدھیا پردیش میں بھی پٹرولیم مصنوعات مہنگی ہوگئیں۔ بھوپال میں پٹرول 114 روپے 9 پیسے، ڈیزل 103 روپے 40 پیسے لٹر مہنگا ہوا۔ جھارکنڈ میں پٹرول اور ڈیزل کی قیمتیں فی لٹر 100 روپے کے قریب پہنچ گئیں۔ پٹرولیم مصنوعات جھارکنڈ میں سب سے سستی قرار دی جاتی ہیں۔

بھارت کے بڑے شہروں میں پٹرول کی قیمت 100 روپے لٹر سے زائد ہوگئی۔ بیشتر بڑے شہروں میں ڈیزل کی قیمت 100 روپے لٹر کے قریب پہنچ گئی۔ کچھ شہروں میں ڈیزل کی قیمت 100 روپے سے زائد ہوگئی ہے۔

عوام کا کہنا ہے کہ مودی حکومت نے شہریوں کا جینا حرام کر رکھا ہے۔ کچھ دن سکون کے نہیں گزرتے کہ پٹرول کی قیمتیں بڑھا دی جاتی ہیں۔ بھارتی سرکار عوام کو بنیادی انسانی حقوق فراہم کرنے میں پہلے ہی ناکام تھی۔ عوام پر پٹرول بم سے حملہ کیا جارہا ہے۔