گوگل نیوز پر ہمیں فالو کریںصدر ڈونلڈ ٹرمپ کے عائد کیے گئے امریکی ٹیرف سے پاکستانی برآمدات متأثر ہوں گی۔ ماہرین کا کہنا ہے کہ برآمدات کو 70 کروڑ ڈالر تک کے نقصان کا خدشہ ہے۔
تفصیلات کے مطابق مقامی اخبارات میں شائع رپورٹ کے مطابق ابتدائی اندازوں کے مطابق امریکی صدر ڈونلڈ ٹرمپ کی جانب سے پاکستانی ساختہ مصنوعات پر لگائے گئے 29 فیصد ٹیرف سے پاکستانی برآمدات کو 50 سے 70 کروڑ ڈالر تک نقصان کا خدشہ ہے۔
قبل ازیں امریکی صدر ڈونلڈ ٹرمپ کی جانب سے ٹیرف کے نفاذ کے بعد دنیا بھر میں تشویش نے جنم لیا ہے۔ پاکستان جیسے ترقی پذیر ممالک ٹیرف میں کمی کیلئے مذاکرات کا راستہ اختیار کرنے پر غور کر رہے ہیں جبکہ یورپی یونین نے جوابی ٹیرف لگانے کی دھمکی دے دی۔
امریکی صدر ٹرمپ کے اقدام کے نتیجے میں دنیا بھر میں بے یقینی کی فضا پیدا ہونے کے باعث امریکی مارکیٹس سمیت مختلف مارکیٹس میں کساد بازاری کا خدشہ ہے۔ اس سے قبل پاکستان سمیت ایشیا کی اسٹاک مارکیٹس میں سرمایہ کاروں کو بھاری نقصان اٹھانا پڑا تھا۔
حال ہی میں امریکی صدر نے چین، کینیڈا، جاپان، یوکرین اور یورپی یونین سمیت متعدد ممالک پر ٹیرف عائد کرتے ہوئے کہا تھا کہ جو ملک امریکی مصنوعات پر ٹیرف عائد کریں گے،، ہم ان پر جوابی ٹیرف لگائیں گے۔ ٹیرف ختم کرنے کیلئے واحد راستہ یہی ہے کہ کمپنیاں امریکا میں اپنی مصنوعات تیار کریں۔
