گوگل نیوز پر ہمیں فالو کریںوزیرِ خزانہ محمد اورنگزیب نے کہا ہے کہ پاکستان کی معیشت نے 2025 میں 2اعشاریہ 7 فیصد ترقی کی ہے۔
اسلام آباد میں قومی اقتصادی سروے کے اجرا کے موقع پر میڈیا سے گفتگو کرتے ہوئے وزیرِ خزانہ نے کہاکہ وزیراعظم شہباز شریف کی قیادت میں اقتصادی اشاریے بہتر ہوئے ہیں اور جی ڈی پی میں اضافہ معیشتی ترقی کی علامت ہے۔ مہنگائی میں خاطر خواہ کمی آئی ہے اور ملک درست سمت میں گامزن ہے۔
انہوں نے مزید کہا کہ پالیسی شرح سود 22 فیصد سے کم ہو کر 11 فیصد پر آگئی ہے جبکہ قرض کا تناسب جی ڈی پی کے مقابلے میں بہتر ہوا ہے جو 68 فیصد سے کم ہو کر 65 فیصد رہ گیا ہے۔
اقتصادی بحالی کا عمل 2024 میں شروع ہوا تھا اور 2025 میں بھی جاری ہے۔ عالمی سطح پر جی ڈی پی کی شرح نمو سست روی کا شکار ہے تاہم پاکستان کی کارکردگی کو اس وسیع تناظر میں دیکھنا ضروری ہے۔
وزیرِ خزانہ نے کہاکہ ہماری اقتصادی بحالی کو عالمی حالات کے پیش نظر سمجھنا چاہیے۔ انہوں نے بتایا کہ بجلی کی تقسیم کرنے والی کمپنیوں میں ماہر بورڈز مقرر کیے گئے ہیں اور قومی ترسیلی کمپنی کو تین حصوں میں تقسیم کیا گیا ہے، جو حکمرانی کے اصلاحات کا حصہ ہے۔ حکمرانی میں بہتری نے بحالی کے عمل کو فروغ دیا ہے۔
انہوں نے مزید کہا کہ توانائی کے شعبے میں ماضی کے مسائل اور جاری نقصانات کو ختم کرنے کے لیے اقدامات جاری ہیں۔ سرکاری ادارے اب بھی چیلنج بنے ہوئے ہیں اور ان کے خسارے کی رقم 800 ارب روپے تک پہنچ گئی ہے۔
