عورت مارچ کے نام پر اسلامی اقدار کا مذاق اڑایا جاتا ہے۔نور الحق قادری

اسلام آباد: وفاقی وزیر برائے مذہبی امور پیر نور الحق قادری نے کہا ہے کہ عورت مارچ کےنام پر اسلامی اقدار کا مذاق اڑایا جارہا ہے، جو نعرے لگائے جاتے ہیں، اخلاق سے گرے ہوئے ہیں۔

تفصیلات کے مطابق نجی ٹی وی پروگرام میں گفتگو کرتے ہوئے وفاقی وزیرِ مذہبی امور نے کہا کہ میں نے عورت مارچ پر وزیراعظم کو خط لکھا لیکن میں خواتین پر ظلم کےخلاف آوازاٹھانے کی مخالفت نہیں کرتا۔

یہ بھی پڑھیں:

شیری رحمان کا نور الحق قادری پر خواتین کے حقوق کیخلاف سازش کا الزام

گفتگو کے دوران وزیرِ مذہبی امور نے کہا کہ عورت مارچ کے دوران لگائے گئے نعرے اور اٹھائے گئے بینرز اخلاق باختہ تھے۔ سب جانتے ہیں، مذہبی اقدار کے منافی نعرے کون سے ہیں۔ اس سے رنجیدہ ہو کر وزیر اعظم کو خط لکھا تھا۔ 

وزیرمذہبی امور نور الحق قادری نے کہا کہ پاکستان کو انتہا پسند ملک بنانے کی خواہش نہیں، وزیر اعظم سے خواتین کے بنیادی مسائل اجاگر کرنے کا کہا ہے۔ عورت مارچ کے منشور سے کیا کرنا، میرا اعتراض ان کے نعروں پر ہے۔ 

پیر نور الحق قادری نے عورت مارچ والوں کے کچھ نعروں کو فوٹو شاپ اور کچھ کو قابل اعتراض قرار دیتے ہوئے کہا کہ اسلام کے میانہ روی کے فلسفے پر چلتا ہوں۔ ہم تنوع کی بجائے دینی و معاشرتی اقدار پر حملوں کی مخالفت کرتے ہیں۔ 

خیال رہے کہ اس سے قبل پیپلز پارٹی کی سینیٹر شیری رحمان نے وفاقی وزیرِ مذہبی امور پیر نور الحق قادری کے وزیر اعظم کو لکھے گئے خط پر ردِ عمل دیتے ہوئے  خواتین کے حقوق کے خلاف سازش کرنے کا الزام عائد کیا۔

سماجی رابطے کی ویب سائٹ ٹوئٹر پر گزشتہ روز اپنے پیغام میں سینیٹر شیری رحمان نے کہا کہ وفاقی وزیر برائے مذہبی امور نور الحق قادری کا 8 مارچ کو عورت مارچ پر پابندی عائد کرنے کے متعلق وزیر اعظم کو خط قابلِ تشویش ہے۔