تجسس سے بھر پور، نیلم منیر کی فلم ‘چکر’ کا ٹریلر جاری

پاکستانی شوبز انڈسٹری کے معروف اداکار احسن خان اور نیلم منیرنئی فلم چکر میں ایک ساتھ جلوہ گر ہوں گے جس کا ٹریلرجاری کردیا گیا ہے۔

یاسر نواز کی ہدایتکاری میں بننے والی اس فلم میں اداکارہ نیلم منیر کے ہمراہ اداکار احسن خان اور جاوید شیخ بھی اسکرین پر نظر آئیں گے اور فلم کو 2022 کی عیدالفطر پر سینیما گھروں میں ریلیز کیا جائے گا۔

فلم چکر میں جاوید شیخ،احمد حسن، محمود اسلم اور نوید رضا سمیت دیگر اداکار شامل ہیں۔

فلم کی کہانی جرم و سزا اور قتل کے کیس پر مبنی ہے جس میں ظاہری طور پر مرکزی اداکارہ کا اغواء، موٹر سائیکل سوار مسلح ملزمان کا حملہ، لاہور میں موجود مرکزی اداکاروں کی پریشانی سمیت دیگر مناظر دکھائے گئے ہیں۔

فلم کے ٹریلر جاری ہونے کے بعد سوشل میڈیا پر ملا جلا ردعمل سامنے آرہا ہے، کچھ صارفین کی جانب سے اس کی تعریف کی جارہی ہے جبکہ کچھ کی جانب سے تنقید بھی کی جارہی ہے۔

یہ بھی پڑھیں:ہتک عزت کیس،علی ظفر کی میشا شفیع کی درخواست پر جرمانے کی استدعا

خیال رہے کہ فلم چکر یاسر نواز کی چوتھی فلم ہے، اس سے قبل اُن کی فلم رانگ نمبر 2 ریلیز ہوئی تھی جس میں سمیع خان اور نیلم منیر مرکزی کرداروں میں تھے۔