گوگل نیوز پر ہمیں فالو کریںلاہور: پنجاب میں کسان کارڈ پر سابق وزیراعظم نواز شریف کی تصویر لگانے کے فیصلے کو لاہور ہائی کورٹ میں چیلنج کر دیا گیا ہے۔
درخواست گزار مشکور حسین نے اپنی درخواست میں مؤقف اختیار کیا کہ وزیر اعلیٰ مریم نواز نے کسان کارڈ پر نواز شریف کی تصویر لگانے کی منظوری دی ہے تاہم عوامی فنڈز ذاتی تشہیر کے لیے استعمال نہیں کیے جا سکتے۔
قومی خزانے کو ذاتی تشہیر کے لیے استعمال کرنا سپریم کورٹ کے فیصلے کی خلاف ورزی ہے، درخواست میں استدعا کی گئی ہے کہ عدالت درخواست پر فیصلہ آنے تک تصویر لگانے کے فیصلے پر عملدرآمد روک دے۔
واضح رہے کہ وزیراعلیٰ پنجاب مریم نواز نے ’’نواز شریف کسان کارڈ پراجیکٹ‘‘ کی منظوری دیتے ہوئے کہا تھاکہ منصوبے کا مقصد صوبے میں زرعی شعبے اور کسانوں کی سماجی و معاشی حالت کو بہتر بنانا ہے۔
وزیراعلیٰ نے زرعی اصلاحات سے متعلق اجلاس کی صدارت کرتے ہوئے کہا تھا کہ کسان کارڈ کے تحت 500000 چھوٹے کسانوں کو آسان شرائط پر قرض دیا جائے گا۔ یہ قرضہ 150 ارب روپے کا ہو گا اور ایک سال میں دیا جائے گا۔
کسانوں کو بیج، کھاد اور کیڑے مار ادویات کی خریداری کے لیے فی ایکڑ زمین کے حساب سے 30 ہزار روپے کے قرضے بھی دیے جائیں گے۔ انہوں نے مزید کہا تھا کہ نواز شریف کسان کارڈ کے تحت کسانوں کو مختلف اقسام کی سبسڈی بھی فراہم کی جائے گی۔
