جماعت کا کوئی رکن آئندہ عسکری قیادت سے ملاقات نہیں کریگا،نوازشریف

لندن: سابق وزیر اعظم اور پاکستان مسلم لیگ (ن) کے سربراہ نواز شریف نے (ن) لیگی رہنما محمد زبیر کی عسکری قیادت سے خفیہ ملاقاتوں کی تصدیق کرتے ہوئے کہا ہے کہ آئندہ ہماری جماعت کا کوئی رکن عسکری قیادت سے ملاقات نہیں کرے گا۔

نواز شریف نے اپنے ٹوئٹر اکاؤنٹ پر جاری بیان میں کہا کہ حالیہ واقعات سے ایک بار پھر ثابت ہوتا ہے کہ کس طرح بعض ملاقاتیں 7 پردوں میں چھپی رہتی ہیں اور کس طرح بعض کی تشہیر کرکے انہیں مرضی کے معنی پہنائے جاتے ہیں۔ نواز شریف نے کہا کہ یہ کھیل اب بند ہوجانا چاہیے۔

حالیہ واقعات سے ایک بار پھر ثابت ہوتا ہے کہ کس طرح بعض ملاقاتیں سات پردوں میں چھپی رہتی اور کس طرح بعض کی تشہیر کرکے مرضی کےمعنی پہنائے جاتے ہیں۔یہ کھیل اب بند ہوجانا چاہئے۔ آج میں اپنی جماعت کو ہدایات جاری کررہا ہوں کہ آئین پاکستان کے تقاضوں اور خودمسلح افواج کواپنے حلف کی۔۔۔1/2

— Nawaz Sharif (@NawazSharifMNS) September 24, 2020

نواز شریف نے کہا کہ آج میں اپنی جماعت کو ہدایات دے رہا ہوں کہ آئندہ ہماری جماعت کا کوئی رکن، انفرادی، جماعتی یا ذاتی سطح پر عسکری اور متعلقہ ایجنسیوں کے نمائندوں سے ملاقات نہیں کرے گا۔

انہوں نے کہا کہ قومی دفاع اور آئینی تقاضوں کے لئے ضروری ہوا تو جماعتی قیادت کی منظوری کے ساتھ اس طرح کی ہر ملاقات اعلانیہ ہوگی اور اسے خفیہ نہیں رکھا جائے گا۔

یاد رہے کہ چند روز قبل وزیر ریلوے شیخ رشید کی جانب سے انکشاف کیا گیا تھا کہ مسلم لیگ (ن) کے ایک رہنما نے نواز شریف کے نمائندے کی حیثیت سے عسکری قیادت سے 2 مرتبہ خفیہ ملاقاتیں کی ہیں۔