گوگل نیوز پر ہمیں فالو کریںراولپنڈی: آرمی چیف جنرل سید عاصم منیر کا کہنا ہے کہ شہداء کی قربانیاں اور غازیوں کی خدمات ہمارا قیمتی اثاثہ ہیں، انہوں نے کہا کہ حالیہ دنوں میں فوجی تنصیبات پر حملے افسوس ناک اور ناقابل برداشت ہیں۔
آئی ایس پی آر کے جاری کردہ بیان میں کہا گیا ہے کہ جنرل ہیڈ کوارٹرز راولپنڈی میں شہداء اور غازیوں کے اعزاز میں تقریب تقسیم اعزازات کا انعقاد کیا گیا، سپہ سالار جنرل عاصم منیر نے آپریشنز کے دوران شاندار خدمات پر افسران و جوانوں کو فوجی اعزازات سے نوازا۔
آرمی چیف جنرل سید عاصم منیر نے تقریب سے خطاب کرتے ہوئے کہا کہ حالیہ دنوں میں فوجی تنصیبات پر حملے افسوس ناک اور ناقابل برداشت ہیں، سپہ سالار نے 25 مئی کو یوم تکریم شہداء پاکستان منانے کا اعلان کر دیا۔
سپہ سالار نے کہا کہ پاک فوج ادارے سے منسلک ہر فرد اور اس کے لواحقین کو ہمیشہ یاد رکھتی ہے،شہداء کی عظیم قربانیوں کے طفیل ہم آزاد فضا میں زندگی بسر کر رہے ہیں، شہداء کی قربانیاں اور غازیوں کی خدمات ہمارا قیمتی اثاثہ ہیں۔
آرمی چیف کا کہنا تھا کہ مضبوط فوج مملکت کی سلامتی اور اتحاد کی ضامن ہوتی ہے،ہمارا یہ رشتہ بطور خاندان قابلِ فخر اور فقید المثال ہے، افواج پاکستان کا ہر سپاہی اور افسر تمام تعصبات بالاتر صرف اپنی ذمہ داریوں کو مقدم رکھتا ہے۔
مزید پڑھیں:پنجاب انتخابات: حکومت کی 14مئی کو الیکشن کے فیصلے پرنظرثانی کی استدعا
آئی ایس پی آر کے مطابق تقریب میں بڑی تعداد میں سینئر افسران اور شہداء کے اہل خانہ نے شرکت کی،تقریب میں 51 افسران کو ستارہ امتیاز،22 افسران و جوانوں کو تمغہ بسالت سے نوازا گیا، 2 جوانوں کو اقوام متحدہ کے خصوصی میڈل کے اعزاز سے نوازا گیا۔
