نیب نے رمضان شوگر ملز کیس میں شہباز شریف ،حمزہ شہباز کے خلاف ضمنی ریفرنس دائر کر دیا

لاہور: قومی احتساب بیورو رمضان شوگر ملز کیس میں مسلم لیگ (ن) کے صدر محمد شہباز شریف اور پنجاب اسمبلی میں قائد حزب اختلاف حمزہ شہباز کے خلاف ضمنی ریفرنس دائر کر دیا، دوران سماعت تلخی کا ماحول بھی پیدا ہوا ،احتساب عدالت نے حمزہ شہباز کے جوڈیشل ریمانڈ میں28نومبر تک توسیع کر دی ۔

احتساب عدالت کے جج امجد نذیر چوہدری نے شہباز شریف اور حمزہ شہباز کے خلاف رمضان شوگر ملز کیس کی سماعت کی۔دوران سماعت عدالت نے حمزہ شہباز کو کٹہرے میں طلب کیا اور کارکنوں کی حمزہ شہباز کے ساتھ سیلفیوں پر شدید برہمی کا اظہار کیا۔

سماعت کے دوران جج امجد نذیر چوہدری نے حمزہ شہباز سے مکالمے میں کہا کہ مسٹر حمزہ یہاں فوری کٹہرے میں آئیں جس پر حمزہ شہباز نے کہا کہ یہ آپ کیسے بات کر رہے ہیں؟،اس پر جج امجد نذیر چوہدری نے کہا کہ آپ عدالت کا ڈیکورم خراب کر رہے ہیں، آپ پریس کانفرنس کرنے آتے ہیں؟۔

جس پر حمزہ شہباز نے سوال کیا کہ آپ مجھ سے کیسے بات کر رہے ہیں؟ جج امجد نذیر چوہدری نے برہمی کا اظہار کرتے ہوئے کہا کہ عدالتی کارروائی کرنی ہے یہ سیلفیاں اور یہ سب کیا ہو رہا ہے، جب تک حمزہ پیچھے بیٹھے رہیں گے کیس نہیں چلے گا۔

حمزہ شہباز نے کہا کہ میں عدالت کا احترام کرتا ہوں، میں ان لوگوں کو اور کارکنوں کو ساتھ لے کر نہیں آیا۔ہجوم میں آرہا ہوں، لوگ سلام کرتے ہیں اس کا جواب دینا اسلام میں ہے، جج صاحب مجھے آپ کی بات کرنے کا طریقہ ٹھیک نہیں لگا۔

مسلم لیگ (ن) کے رہنما رانا مشہود نے کہا کہ حمزہ شہباز رکن صوبائی اسمبلی ہیں، جتنے بھی ملزم آتے ہیں وہ 90، 90 روز تک نیب کے پاس رکھے جاتے ہیں۔اس طرح تو قاتلوں کو بھی نہیں بلایا جاتا جیسے آپ نے حمزہ شہباز کو بلایا ہے۔جج امجد نذیر چوہدری نے ریمارکس دئیے عدالت کا ڈیکورم سب سے پہلی چیز ہے، اگر عدالت کا ڈیکورم خراب کریں گے تو اس طرح کام نہیں چلے گا۔

جج امجد نذیر چوہدری نے حمزہ شہباز کو حکم دیا کہ آئندہ آپ جب بھی عدالت آئین تو سیدھا کٹہرے میں آئیں گے۔بعدازاں عدالت نے شہباز شریف سے متعلق استفسار کیا جس پر ان کے وکیل نے بتایا کہ شہباز شریف کی حاضری سے استثنیٰ درخواست دائر کی گئی ہے۔

عدالت نے شہباز شریف کی رمضان شوگر مل میں ایک روز کی حاضری سے استثنیٰ کی درخواست منظور کر لی۔ دوران سماعت نیب پراسکیوٹر وارث علی جنجوعہ نے بتایا کہ رمضان شوگر ملز کے کیس میں ضمنی ریفرنس دائر کر دیا گیا ہے جو کہ 325 صفحات پر مشتمل ہے۔

شہباز شریف کے وکلاء نے آشیانہ اقبال کیس میں بھی استثنیٰ کی درخواست دائر کی جسے منظور کر لیا گیا ۔دوران سماعت شریک ملزمان بھی پیش ہوئے ۔ حمزہ شہباز کی عدالت میں پیشی کے موقع پر سکیورٹی کے انتہائی سخت انتظامات کئے گئے تھے اور راستوں کو کنٹینرز، بیرئیرز اور خار دار تاریں لگا کر بند رکھا گیا۔