گوگل نیوز پر ہمیں فالو کریںصوبہ پنجاب اور سندھ کے نگران وزرائے اعلیٰ نے کچے کے ڈاکوؤں کے خلاف مشترکہ آپریشن بیک وقت شروع کرنے پر اتفاق کیا ہے۔
تفصیلات کے مطابق نگران وزیر اعلیٰ پنجاب محسن نقوی اور نگران وزیر اعلیٰ سندھ جسٹس (ر) مقبول باقر کے مابین کچے کے علاقوں میں بیک وقت آپریشن شروع کرنے پر اتفاق ایک ملاقات کے دوران ہوا۔
افغانستان میں استعمال کیے گئے ہتھیار کچے میں ہیں۔بلاول
ترجمان وزارتِ اعلیٰ کا کہنا ہے کہ پنجاب کے کچے میں وہاں کی ایجنسیوں کے ذریعے آپریشن کا آغاز کیا جائے گا، اسی وقت سندھ میں بھی آپریشن کی ابتدا ہوگی تاکہ کوئی بھی ڈاکو ایک سے دوسرے صوبے میں فرار نہ ہو۔
کچے کے ڈاکوؤں کے مابین فیصلہ کن آپریشن میں پنجاب پولیس اور سندھ پولیس کے علاوہ قانون نافذ کرنے والے دیگر اداروں کے مابین رپورٹ شیئرنگ کا بھی فیصلہ کر لیا گیا۔ ملاقات کے دوران گندم سمیت دیگر معاملات پر بھی گفتگو ہوئی۔
خیال رہے کہ اس سے قبل چیئرمین پی پی پی بلاول بھٹو زرداری نے کہا کہ امریکی فوج کے افغانستان میں استعمال کیے گئے ہتھیار کچے کے ڈاکوؤں کے پاس موجود ہیں جبکہ پولیس نے جانوں کے نذرانے پیش کیے۔
سکھر میں گزشتہ ماہ شہید صحافی جان محمد مہر کے اہلِ خانہ سے تعزیت کے بعد میڈیا سے گفتگو کرتے ہوئے بلاول بھٹو زرداری نے کہا کہ افغانستان میں موجود امریکی اسلحہ سندھ کے کچے کے ڈاکوؤں کے پاس پہنچ چکا ہے۔
