اسلام آباد: وزیر اعظم پاکستان عمران خان نے کہا ہے کہ ایم ٹی آئی آرڈیننس (میڈیکل ٹیچنگ انسٹیٹیوٹ آرڈیننس) سرکاری ہسپتالوں کی بہتر اور جدید انتظامی خدمات کے لیے متعارف کروایا جا رہا ہے۔ اس سے ہسپتال پرائیویٹ نہیں ہوں گے بلکہ یہ سرکاری ہسپتالوں کی اصلاحات کا منصوبہ ہے۔
سماجی رابطے کی ویب سائٹ ٹوئٹر پر اپنے پیغام میں وزیر اعظم نے کہا کہ ایم ٹی آئی قانون کے ذریعے سرکاری ہسپتالوں میں اصلاحات لائی جائیں گی۔ بہتر ہسپتالوں کی وجہ سے مریضوں کو بہتر طبی سہولیات ملیں گی۔
یہ بھی پڑھیں: اسلام آبادلاک ڈاؤن،مولانافضل الرحمان نے لائحہ عمل تیارکرلیا
The MTI Act/Ordinance is to enable improved & modern management of public sector hospitals. This is NOT privatization but part of our public sector hospitals’ reform plan.The hospitals will remain Govt hospitals. Better managed hospitals will mean better facilities for patients.
— Imran Khan (@ImranKhanPTI) September 5, 2019
یاد رہے کہ اس سے قبل وزیر اعظم پاکستان عمران خان نے قانون نافذ کرنے والے اداروں کے اہلکاروں کی گڈز ٹرانسپورٹ اور ٹرکوں سے بھتہ وصولی کا سخت نوٹس لے لیا۔ وزیر اعظم کے آفس سے جاری کردہ بیان میں کہا گیا کہ پولیس، ایکسائز، کسٹمز، رینجرز اور ایف سی اہلکار کراچی طورخم اور کراچی چمن روٹ پر بھتہ وصول کرنے کی شکایات میں اضافہ ہو رہا ہے۔ ٹرانسپورٹرز سے زبردستی کرایہ وصول کیا جاتا ہے۔ اس سے نہ صرف ذرائع آمدورفت مہنگے ہوجاتے ہیں بلکہ ملک کی بدنامی بھی ہوتی ہے۔
بیان میں مؤقف اختیار کیا گیا کہ ٖغیر قانونی کرایہ وصولی اور بھتہ خوری کمزور نگرانی یا حقائق چھپانے کا ثبوت ہے۔ ایکسائز اینڈ ڈیوٹی قوانین کی خلاف ورزی کرنے کا یہ عمل سیکیورٹی اداروں کی کارکردگی پر سوالیہ نشان ہے۔ بادی النظر میں غیر قانونی ذرائع سے حاصل کردہ پیسہ افسرانِ اعلیٰ تک پہنچتا ہے جس کی کسی بھی طرح اجازت نہیں دی جاسکتی۔
مزید پڑھیں: چیک پوسٹوں پر سیکیورٹی اہلکاروں کی گڈز ٹرانسپورٹ سے بھتہ وصولی: وزیر اعظم نے نوٹس لے لیا