کوئی ڈی چوک تک آکر تو دکھائے، محسن نقوی نے سخت وارننگ دیدی

اسلام آباد: وفاقی وزیر داخلہ محسن نقوی نے خبردار کیا ہے کہ پاکستان تحریک انصاف کو ڈی چوک پر احتجاج کرنے کی اجازت نہیں دی جائے گی، اگر پارٹی نے ’ریڈ لائن‘ عبور کرنے کی کوشش کی تو سخت کارروائی کی جائے گی۔

اسلام آباد میں صحافیوں سے بات کرتے ہوئے وزیر داخلہ نے کہا کہ اسلام آباد ہائی کورٹ نے حکومت کو پی ٹی آئی کے ساتھ مذاکرات کرنے کی ہدایت دی ہے اور پارٹی کو سنگجانی کے علاقے میں احتجاج کی اجازت دی گئی ہے۔

انہوں نے کہا، “حکومت پی ٹی آئی کو مقررہ ریڈ لائن عبور کرنے کی اجازت نہیں دے گی۔”وزیر داخلہ نے خبردار کیا کہ اگر پی ٹی آئی نے ریڈ لائن عبور کرنے کی کوشش کی تو حکومت سخت اقدامات کرنے پر مجبور ہوگی، جن میں کرفیو نافذ کرنا بھی شامل ہے۔

اسلام آباد میں پی ٹی آئی کارکنوں نے گاڑی سے کچل دیا، رینجرز کے 4 جوان شہید

محسن نقوی نے پی ٹی آئی قیادت سے اپیل کی کہ وہ حالات کو اس نہج پر نہ لے جائیں کہ حکومت کو سخت اقدامات کرنے پڑیں۔

انہوں نے کہا، “جو بھی ڈی چوک پہنچے گا اسے گرفتار کیا جائے گا اور حکومت انہیں آزادانہ طور پر آنے اور جانے کی اجازت نہیں دے گی۔”وزیر داخلہ نے پی ٹی آئی کے احتجاج کی ٹائمنگ پر بھی سوال اٹھایا، خاص طور پر اس وقت جب ملک میں بین الاقوامی وفود موجود ہیں۔ انہوں نے کہا کہ یہ پیغام پی ٹی آئی کو پہنچا دیا گیا ہے اور حکومت ان کے جواب کا انتظار کر رہی ہے۔