عدالت کاملک شہزاد اعوان کی گرفتاری اور شناختی کارڈ بلاک کرنے کا حکم

کراچی:جوڈیشل مجسٹریٹ غربی نے شہری کے گھر میں داخل ہوکرتشدد قتل کی دھمکیاں دینے کے مقدمے میں مفرور رکن سندھ اسمبلی ملک شہزاد اعوان کی گرفتاری اور شناختی کارڈ بلاک کرنے کا حکم دیدیا۔

جمعہ کو جوڈیشل مجسٹریٹ غرنی کی عدالت نے شہری کے گھر میں داخل ہوکرتشدد قتل کی دھمکیاں دینے کے کیس کی سماعت ہوئی۔ عدالت نے مفرور رکن سندھ اسمبلی ملک کی گرفتاری اورملک شہزاد اعوان کا قومی شناختی کارڈ بلاک کرنے کا بھی حکم دیا ہے۔

عدالت نے اسپیکر سندھ اسمبلی کو خط کے ذریعے ملک شہزاد اعوان کے مفرور وارنٹ گرفتاری سے آگاہ کردیا۔مفرور رکن سندھ اسمبلی ملک شہزاد اعوان کی گرفتاری کیلئے پولیس سے تعاون کیا جائے۔

مزید پڑھیں:پی ٹی آئی کے رکن سندھ اسمبلی ملک شہزاد اعوان قیادت کے فیصلوں سے ناراض، استعفیٰ دے دیا

پولیس چالان کے مطابق ملزم ملک شہزاد سمیت 3 ملزمان شہری ملک اسلم کے گھر مسلح داخل ہوئے۔ ملک اسلم کے بیٹے سجاد کو کلاشنکوف کے بٹ مار کر ہاتھ مفلوج کردیا۔خواتین سے بدتمیزی کی مدعی مقدمہ کو زدوکوب کیا۔ مدعی مقدمہ کو قتل کی دھمکیاں دیں۔

وکیل مدعی نے موقف دیا کہ پولیس نے مقدمہ کو بی کلاس کردیا تھا۔ سیشن عدالت میں بی کلاس رپورٹ کو چیلج کیا۔ سیشن عدالت نے پولیس رپورٹ کو مسترد کردیا۔ عدالت نے تفتیشی افسر سے ملزمان کی گرفتاری اور پروگریس رپورٹ بھی طلب کرلی ہے۔

پولیس کے مطابق دیگر مفرور ملزمان میں عمران شاہ اور قیصر شامل ہیں۔ ملزمان کے خلاف تھانہ مدینہ کالونی میں مقدمہ درج ہے۔