گوگل نیوز پر ہمیں فالو کریںسینٹ جونز: خواتین کی قومی کرکٹ ٹیم کی کپتان جویریہ خان نے کہا ہے کہ دورۂ ویسٹ انڈیز کے دوران ٹیم کی کارکردگی شاندار ہوگی تاہم ویسٹ انڈیز کوئی آسان حریف نہیں۔
تفصیلات کے مطابق پاکستان نیشنل ویمن ٹیم رواں سال اپنے تیسرےغیر ملکی دورے پر ویسٹ انڈیز میں موجود ہے۔ جہاں پاکستان بدھ کے روز ویسٹ انڈیز کے خلاف اپنا پہلا ٹی ٹوئنٹی میچ سر ووین رچرڈ اسٹیٹڈیم میں کھیلے گا۔
ماضی میں قومی ٹیم تین ایک روزہ ، دو ٹی ٹوئنٹی سیریز اور آئی سی سی ویمن ٹی ٹوئنٹی ورلڈ کپ کھیلنے کے لیے کیربین جزائز کا دورہ کر چکی ہے۔ تاہم قومی خواتین کرکٹ ٹیم انٹیگا کی سرزمین پر اپنا پہلا ٹی ٹوئنٹی میچ 30 جون کو کھیلے گی۔
آئی سی سی ویمن ٹی ٹوئنٹی رینکنگ میں پاکستان ساتویں جبکہ ویسٹ انڈیز چھٹے نمبرپر موجود ہے۔قومی خواتین کرکٹ ٹیم کی کپتان جویریہ خان پر امید ہیں کہ انکی ٹیم نے اس دورے کیلئے سخت محنت کی ہے، اسکے نتائج بھی شاندار ہوں گے۔
جویریہ خان نے میڈیا سے گفتگو کرتے ہوئے کہا کہ کورونا وائرس جیسے وبائی مرض کے بعد خواتین کی کرکٹ کو دنیا بھرمیں نقصان پہنچا۔ دورۂ ویسٹ انڈیز پاکستان کرکٹ بورڈ کا شاندار اقدام ہے ۔اس دورے سے خواتین کی کرکٹ کو فروغ ملے گا۔
کپتان جویریہ خان نے بتایا کہ ہم نے ملتان اور کراچی کے کیمپس میں سخت محنت کی ہے۔ دونوں کیمپس ہمارے لیے نہایت اہم تھے کیونکہ لاک ڈاؤن کی وجہ سے ملک کے مختلف حصوں میں کھیلوں کی سرگرمیاں معطل تھیں۔
قومی کرکٹ ٹیم کی کپتان نے کہا کہ کیمپس میں کھلاڑیوں نے بین الاقوامی معیار کے مطابق سخت ماحول میں پریکٹس کی۔جویریہ خان نے ویسٹ انڈیز ٹیم کو معیاری اپوزیشن قرار دیتے ہوئے کہا کہ میزبان ٹیم کوئی آسان حریف نہیں ہے۔
میزبان ٹیم کی تعریف کرتے ہوئے جویریہ خان نے کہا کہ ہمارے لیے یہ دورہ ایک چیلنج کی حیثیت رکھتا ہے جس کیلئے ٹیم تیار ہے۔ ماضی کی کامیابیوں سے ہمیں حوصلہ ملتا ہے مگر ہر دن نئے چیلنجز کے ساتھ طلوع ہوتا ہے۔
اپنی تیاری پر روشنی ڈالتے ہوئے کپتان جویریہ خان نے کہا کہ ہم انفرادی اور اجتماعی سطح پر مقابلے کے لیے تیار ہیں۔ویسٹ انڈیز کا دورہ تاریخی ہے۔پاکستان ویمن کرکٹ کی تاریخ میں پہلی مرتبہ اے ٹیم بھی نیشنل ٹیم کے ساتھ دورہ ویسٹ انڈیز پر موجود ہے۔
خواتین کھلاڑیوں کی قومی اے ٹیم ویسٹ انڈیز کی اے ٹیم کے ساتھ تین ٹی ٹوئنٹی اور تین ایک روزہ میچ کھیلے گی۔ سدرہ نواز قومی ٹیم کے ساتھ 52 ٹی ٹوئنٹی میچز کھیلنے کا تجربہ رکھتی ہیں جو ہر میچ کے دوران اے ٹیم کی قیادت کریں گی۔
اے ٹیم کے متعلق جویریہ خان نے کہا کہ وہ ہمارے ساتھ ویسٹ انڈیز کے دورے پر ہیں۔ ملک میں خواتین کے کھیلوں کی نشوونما اور فروغ کیلئے یہ شاندار قدم ہے جس سے ملک میں کھیل کی سرگرمیوں پر اچھا اثر پڑے گا۔
نوجوان کھلاڑیوں کو پیغام دیتےہوئے قومی ویمن ٹیم کی کپتان جویریہ خان نے کہا کہ نوجوانوں کے پاس اپنی صلاحیتوں کو ثابت کرنے کا نادر موقع ہے۔ نوجوان نئے چیلنجز کا مقابلہ کریں اور اپنی پرفارمنس سے خود کو بہترین ثابت کریں۔
دورۂ ویسٹ انڈیز میں پاکستانی کھلاڑیوں کی فہرست
جویریہ خان (کپتان ، قومی ٹیم) ، رامین شمیم (ون ڈے کپتان ، اے ٹیم) ، سدرہ نواز (ٹی ٹوئنٹی کپتان ، اے ٹیم) ، عالیہ ریاض ، ایمن انور ، انعم امین ، عائشہ نسیم ، عائشہ ظفر ، ڈیانا بیگ ، فاطمہ ثناء ، ارم جاوید، جویریہ رؤف ، کائنات امتیاز ، کائنات حفیظ ، ماہم طارق ، منیبہ علی صدیقی، ناہیدہ خان ، ناجیہ علوی(وکٹ کیپر) ، ناشرا سندھو ، نتالیہ پرویز ، ندا ڈار ، عمائمہ سہیل ، صبا نذیر ، سعدیہ اقبال ، سدرہ امین اور سیدہ عروب شاہ۔
یہ بھی پڑھیں: قومی کرکٹ ٹیم کی خواتین کھلاڑیوں کیلئے سنٹرل کنٹریکٹ کا اعلان
