گوگل نیوز پر ہمیں فالو کریںاسرائیل اور حماس غزہ میں 5 روز کے لیے جنگ بندی پر رضا مند ہو گئے ہیں۔ اس بات کا امریکی اخبار کی جانب سے دعویٰ کیا جارہا ہے۔
امریکی اخبار واشنگٹن پوسٹ کی رپورٹ کے مطابق اسرائیل اور حماس امریکی حمایت یافتہ جنگ بندی کی ڈیل پر رضا مند ہوگئے ہیں۔
واشنگٹن پوسٹ کی رپورٹ کے مطابق فریقین نے یرغمالیوں کی رہائی کے بدلے غزہ میں لڑائی میں 5 دن کے وقفے پر اتفاق کیا ہے۔
امریکی اخبارکا اس حوالے سے کہنا ہے کہ 24 گھنٹے میں 50 کے قریب یرغمالیوں کی رہائی کا امکان ہے اور فریقین کے درمیان طے پانے والا معاہدہ 6 صفحات پر مشتمل ہے اور معاہدے میں کلیدی کردار قطر کی جانب سے ادا کیا جارہا ہے۔
دوسری جانب واضح رہے کہ گزشتہ روز بھی اسرائیل نے غزہ میں اقوام متحدہ کے اسکول میں پناہ لیے فلسطینیوں پر بمباری کی جس کے نتیجے میں 200 سے زائد افراد جام شہادت نوش کرگئے۔
مغربی کنارے میں اسرائیلی کارروائیوں کی مذمت کرتے ہوئے جرمن چانسلر اولاف شولز نے کہا کہ مغربی کنارے میں نئی آبادکاریوں کے خواہاں نہیں ہیں۔
اُن کا کہنا تھا کہ اسرائیلیوں اور فلسطینیوں کے لیے دو ریاستی حل ہی بہترین آپشن ہے۔غزہ میں انسانی صورتحال میں فوری بہتری کی ضرورت ہے۔
