اسلام آباد پولیس نے سوشل میڈیا پر اسلحے سے خوف وہراس پھیلانے والوں کو گرفتار کر لیا

اسلام آباد پولیس نے سوشل میڈیا پر اسلحے کی نمائش کرکے خوف و ہراس پھیلانے والے ملزمان کو گرفتار کر لیا ہے۔

تفصیلات کے مطابق سوشل میڈیا پر ویڈیو کے ذریعے اسلحے کی نمائش کرنے والے ملزمان کو اسلام آباد میں سہالہ تھانے کی پولیس نے گرفتار کیا۔

گرفتار ملزمان ڈی ایس ایف کے نام سے سوشل میڈیا پر تنظیم قائم کرکے عوام الناس کو خوفزدہ کرنے میں مصروف تھے۔ملزمان میں تنظیم کے سرکردہ عہدیداران افضل، رفقات، وسیم اور خرم شامل ہیں۔

شہرِ اقتدار میں پولیس نے گرفتار ملزمان کے خلاف مقدمہ قائم کرکے مزید تفتیش شروع کردی ہے جبکہ عوام نے گروہ کی گرفتاری پر اطمینان کا اظہار کیا ہے۔

شہریوں کا کہنا ہے کہ گروہ کے باعث تمام علاقہ نو گو ایریا بن گیا تھا۔ پولیس کو چاہئے کہ ایسے لوگوں کو قانون کے مطابق سخت سزا دے۔