گوگل نیوز پر ہمیں فالو کریںجامعہ بہاولپور اسکینڈل سامنے آنے کے بعد اسلامیہ یونیورسٹی کے سابق وائس چانسلر ڈاکٹر اطہر محبوب کے خلاف تحقیقات شروع کردی گئی ہیں۔
تفصیلات کے مطابق ہائر ایجوکیشن کمیشن جنوبی پنجاب نے سابق وائس چانسلر کے خلاف تحقیقات کیلئے باضابطہ نوٹیفکیشن جاری کردیا جس میں کہا گیا ہے کہ ڈاکٹر اطہر محبوب کے خلاف الزامات کی تحقیقات کیلئے کمیٹی تشکیل دی گئی ہے۔
اسلامیہ یونیورسٹی میں نازیبا ویڈیوز کا مبینہ اسکینڈل کیا ہے؟
تحقیقاتی کمیٹی کی سربراہی ملتان کی بہاؤ الدین زکریا یونیورسٹی کے وائس چانسلر ڈاکٹر محمد علی کو دے دی گئی۔ کمیٹی ڈاکٹر اطہر محبوب کے خلاف مالی بدعنوانیوں اور انتظامیہ بے قاعدگیوں کی تفتیش کرے گی۔
واضح رہے کہ ڈاکٹر اطہر محبوب کے خلاف تحقیقات کا حکم طالبات کی مخربِ اخلاق تصاویر اور منشیات کا اسکینڈل منظرِ عام پر آنے کے بعد دیا گیا۔تحقیقاتی کمیٹی یونیورسٹی اسکینڈلز سے متعلق تمام افراد کی ہر پہلو سے تفتیش کرے گی۔
قبل ازیں اسلامیہ یونیورسٹی کی انتظامیہ نے تمام تر الزامات کو بے بنیاد قرار دیتے ہوئے واقعے کی تحقیقات کا مطالبہ کیا تھا جس کے بعد ڈاکٹر اطہر محبوب کے خلاف تحقیقات کا فیصلہ کیا گیا۔ جامعہ کا چیف سکیورٹی افسر تاحال پولیس کی حراست میں ہے۔
