روشن ڈیجیٹل اکاؤنٹ کے ذریعے ترسیلات زر کاحجم 4.794 ارب ڈالر سے تجاوز کرگیا

کراچی: اسٹیٹ بینک کے جاری کردہ اعدادوشمار کے مطابق روشن ڈیجیٹل اکاؤنٹ کے ذریعے ترسیلات زر کا حجم 4.794 ارب امریکی ڈالر سے تجاوز کرگیا۔

تفصیلات کے مطابق اسٹیٹ بینک آف پاکستان کے جاری کردہ تازہ ترین اعداد و شمار کے مطابق جولائی کے مہینے کے دوران ترسیلات زر کی آمد 188 لاکھ ڈالر ریکارڈ کی گئی جو جون میں 250 لاکھ ڈالر اور مئی 2022 میں 189 لاکھ ڈالر تھی جو جون کے مقابلے میں 24 فیصد کی کمی کو ظاہر کرتی ہے۔

اعداد و شمار کے مطابق 175 ممالک کے تارکین وطن پاکستانیوں نے روشن ڈیجیٹل اکاؤنٹ کے ذریعے کھولے گئے 441,344 اکاؤنٹس میں رقوم جمع کرائی تھیں۔

کھاتوں کی تعداد بھی جون میں 429,364 سے بڑھ کر جولائی 2022 میں 441,344 ہوگئی، یعنی جولائی میں تقریباً 11,980 نئے اکاؤنٹس کھولے گئے۔

ستمبر 2020 میں شروع ہونے والی اس اسکیم کو بیرون ملک مقیم پاکستانیوں کی جانب سے کوئی خاطر خواہ ردعمل نہیں ملا تھا اور اسی لئے ابتدائی مہینے میں صرف 7 لاکھ ڈالر جمع کرائے گئے، تاہم وقت گزرنے کے ساتھ ساتھ دلچسپی بڑھتی رہی کیونکہ اکتوبر 2020 میں آمد 40 لاکھ ڈالر تک پہنچ گئی اور اکتوبر 2020 میں 110 لاکھ ڈالر تک پہنچ گئی۔