مہنگائی میں ہوشربا اضافہ، معاشی اشارئیے زوال کی جانب گامزن

اسلام آباد: ملک بھر میں مہنگائی میں ہوش ربا اضافے کا سلسلہ جاری ہے، معاشی اعدادوشمار اور اشارئیے زوال کی جانب گامزن ہیں تاہم حکومت کا دعویٰ ہے کہ ملکی معیشت تیزی سے استحکا کی طرف بڑھ رہی ہے۔

تفصیلات کے مطابق رواں مالی سال کے ابتدائی 5ماہ میں مرچنڈائزڈ تجارتی خسارے سے منسوب کیا جانے والا جاری کھاتے کا خسارہ جی ڈی پی کا 4.7 فیصد ریکارڈ کیا گیا۔ رواں مالی سال کے ابتدائی 4ماہ میں مرچنڈائزڈ برآمدات 32فیصد بڑھیں۔

یہ بھی پڑھیں:

شرح سود میں اضافہ تجارت وصنعت کیلئے تباہ کن ہے، ثاقب نسیم، جنید تیلی

حکومت کو سود ادا کرنے کیلئے 3000ارب قرض لینا پڑا۔ علی محمد خان

معاشی تجزیہ کاروں کا کہنا ہے کہ برآمدات میں اضافے کے باوجود درآمدات کی ادائیگی کیلئے زرِ مبادلہ میں خاطر خواہ اضافہ نہیں ہوسکا کیونکہ معاشی بحالی کے دعوے کسی نہ کسی حد تک درست ہونے کے ساتھ ساتھ لگژری گڈز کی طلب میں بھی اضافہ ہوا۔

تجزیہ کاروں کا یہ بھی کہنا ہے کہ پی ٹی آئی دورِ حکومت میں مہنگائی میں مسلسل اضافہ نوٹ کیاجارہا ہے۔ اگست 2019 کے بعد سے غذائی اشیاء کی شرحِ مہنگائی دوہرے ہندسوں تک جا پہنچی۔ مہنگائی میں ہوشربا اضافہ طاہر کرتا ہے کہ زراعت پر توجہ نہیں دی جاسکی۔

شعبۂ زراعت کی شرحِ نمو موزوں نہیں۔ امریکی ڈالر کے مقابلے میں روپے کی ناقدری کے باعث بھی ملکی معیشت کو تباہ حالی کا سامنا ہے۔ مہنگائی میں مسلسل اضاطے کے باعث عوام کیلئے دو وقت کی روٹی کا حصول بھی مشکل ہوگیا ہے جس پر توجہ دی جانی چاہئے۔

ماہرینِ معیشت کا کہنا ہے کہ حکومت کے دعووں کے برعکس اشیائے ضروریہ، کھانے پینے کی چیزیں، پھل اور سبزیاں مہنگی ہورہی ہیں جس کی وجوہات بشمول ذخیرہ اندوزی، مصنوعی مہنگائی اور ناجائز منافع خوری پر قابو پانا وقت کی ضرورت ہے۔