مہنگائی میں اضافہ، 7 روز میں گوشت اور سبزی سمیت 16اشیاء کی قیمتیں بڑھ گئیں

اسلام آباد: ملک بھر میں مہنگائی میں اضافہ ہورہا ہے، گزشتہ 7 روز کے دوران گوشت اور سبزی سمیت 16 اشیائے ضروریہ کی قیمتیں بڑھ گئیں۔

تفصیلات کے مطابق وفاقی ادارۂ شماریات نے ہفتہ وار رپورٹ جاری کردی ہے۔  گزشتہ 7 روز میں 16 اشیائے ضروریہ کی قیمتیں بڑھیں جبکہ 14  کی قیمتوں میں کمی ریکارڈ کی گئی۔ مجموعی طور پر 21 اشیاءکی قیمتیں مستحکم رہیں۔

یہ بھی پڑھیں:

اسٹاک مارکیٹ میں 139 پوائنٹس کی تیزی

وفاقی ادارۂ شماریات کے اعدادوشمار کے مطابق 7 روز میں سرسوں کے تیل کی قیمت میں  3 روپے 84 پیسے فی کلواضافہ ہوا، گھی کی قیمت 3 روپے 52 پیسے بڑھ گئی جس کے بعد گھی کی اوسط قیمت  روپے 85 پیسے فی کلو ہو گئی ہے۔ 

ادارۂ شماریات کی رپورٹ کے مطابق گزشتہ 7 روز میں زندہ مرغی کی اوسط قیمت 11 روپے 49 پیسے زیادہ ہو کر 214 روپے 88 پیسے  جبکہ لہسن کی قیمت 23 روپے 29 پیسے اضافے سے 354 روپے 82 پیسے فی کلو تک جا پہنچی۔ 

رپورٹ کے مطابق گزشتہ ہفتے کے دوران مٹن کی قیمت میں اوسطاً 5 روپے 13 پیسے فی کلو اضافہ ہوا جب کہ ایک ہفتے کے دوران نمک، کیلا، صابن اور چاول کی قیمتیں بھی بڑھ گئیں۔آلو کی قیمت 1 روپیہ 11 پیسے فی کلو کم ہوگئی۔

گزشتہ 7 روز میں پیاز کی قیمت میں 1 روپے فی کلو کی کمی دیکھنے میں آئی جبکہ انڈے بھی فی درجن 3 روپے 39 پیسے تک کم پر فروخت ہونے لگے۔ مختلف دالیں، آٹا، چینی اور ایل پی جی کا گھریلو سلنڈر بھی سستا ہوگیا۔

چینی کی قیمت میں اوسطاً 1روپے 29 پیسے جبکہ ایل پی جی سلنڈرکی قیمت میں 35 روپے 32 پیسے کی کمی ریکارڈ کی گئی۔  ہفتہ وار شرحِ مہنگائی میں معمولی کمی دیکھی گئی جو 18 اعشاریہ 47 فیصد تک آگئی ہے۔ کم آمدنی والے افراد کیلئے شرحِ مہنگائی 20.25فیصد رہی۔