نارتھ کراچی صنعتی ایریا کی سڑکوں پر چنگ چی رکشوں کے ڈیرے، صنعتکاروں کو شدید مشکلات

کراچی: نارتھ کراچی ایسوسی ایشن آف ٹریڈ اینڈ انڈسٹری کے صدر فیصل معیز خان نے نارتھ کراچی صنعتی ایریا میں چنگ چی رکشوں کی بھرمار پر تشویش کا اظہار کرتے ہوئے ڈی آئی جی ٹریفک کراچی سے اپیل کی ہے کہ صنعتی ایریا اور اس کے داخلی و خارجی راستوں پر غیر قانونی رکشہ اسٹینڈز کا خاتمہ کیا جائے۔

نکاٹی کے صدر نے ڈی آئی جی ٹریفک کی توجہ مسلسل ٹریفک جام اور سگنلز پر چنگچی رکشوں کے قبضے کے طرف مبذول کرواتے ہوئے کہاکہ نارتھ کراچی صنعتی ایریا کے داخلی و خارجی راستوں پر اکثر اوقات بدترین ٹریفک جام رہتا ہے کیونکہ سڑکوں اور اندرونی راستوں اور سگنلز پر چنگچی رکشوں کے ڈیرے ہیں جس کی وجہ سے فیکٹریوں میں خام مال کی سپلائی اور برآمدی مال کی ترسیل تاخیر کا شکار ہوتی ہے ۔

انہوں نے نشاندہی کی ٹریفک پولیس کی توجہ نہ ہونے کی وجہ سے چنگچی رکشہ والوں نے ڈیرے جمالیے ہیں۔

مزید پڑھیں: سندھ میں دوبارہ پابندیاں، ریسٹورنٹ، سینماء ملازمین اوراساتذہ گزربسر کیسے کرینگے؟

نارتھ کراچی صنعتی ٰایریا کی مرکزی سڑکوں پر بڑی تعداد میں چنگچی رکشے کھڑے ہونے سے دوطرفہ روڈ بند ہوجاتا ہے جو کسی بڑے حادثے کا سبب بن سکتی ہیں کیونکہ صنعتوں کو خام مال کی فراہمی اور فیکٹریوں سے برآمدی مال کی بندرگاہ ترسیل کے لیے بڑے ٹرالر اور ٹرکوں کی آمدورفت ہوتی ہے۔

چنگ چی رکشوں کی بھرمار کے باعث ٹرالر اکثر اور گاڑیاں سگنلز پر پھنس جاتی ہیں اور صنعتکاروں کو اپنی فیکٹریوں تک پہنچنے میں دشواری کا سامنا رہتا ہے۔

فیصل معیز خان نے ڈی آئی جی ٹریفک کراچی سے درخواست کہ وہ نارتھ کراچی صنعتی کے داخلی و خارجی راستوں اور سگنلز پر ٹریفک جام کا نوٹس لیں اور غیر قانونی چنگچی رکشوں کے اسٹینڈ کا خاتمہ یقینی بنائیں تاکہ صنعتوں کو بلاکسی تاخیر اور رکاوٹ خام مال کی فراہمی یقینی بنائی جاسکے اور برآمدی آرڈرز کی تکمیل بھی بروقت ممکن ہوسکے۔اس ضمن میں نکاٹی اپنا ہر ممکن تعاون پیش کرے گی۔