وزیر اعظم آزاد کشمیر عہدہ چھوڑنے کیلئے تیار، عمران خان نے استعفے سے روک دیا

اسلام آباد: وزیر اعظم آزاد کشمیر عبدالقیوم نیازی اپنے عہدے سے مستعفی ہونے کیلئے تیار ہیں  اور باضابطہ طور پر استعفیٰ دینے کی پیشکش بھی کی تاہم چیئرمین پی ٹی آئی عمران خان نے انہیں یہ اقدام اٹھانے سے روک دیا ہے۔

تفصیلات کے مطابق وزیر اعظم عبدالقیوم نیازی نے چیئرمین پی ٹی آئی عمران خان سے ملاقات کی اور اس دوران تحریکِ عدم اعتماد پر گفتگو کرتے ہوئے بتایا کہ میرے خلاف سازش کی جارہی ہے۔ آپ کو حقائق سے آگاہ کرنے کی بجائے گمراہ کیا گیا ہے۔

یہ بھی پڑھیں:

آصف زرداری کا تحریکِ انصاف اراکین سے استعفے واپس لینے کا مطالبہ

سابق وزیر اعظم عمران خان سے بات چیت کے دوران عبدالقیوم نیازی نے کہا کہ میں اپنے خلاف سازش ثابت کردوں گا جس پر اعتماد کا اظہار کرتے ہوئے چیئرمین پی ٹی آئی نے وزیر اعظم آزاد کشمیر کو استعفیٰ دینے سے رک جانے کی ہدایت کی۔

چیئرمین پی ٹی آئی عمران خان نے آزاد کشمیر کی سیاسی صورتحال اور سردار عبدالقیوم نیازی کے خلاف تحریکِ عدم اعتماد پر کمیٹی تشکیل دے دی جس کی سربراہی سابق وزیر خارجہ شاہ محمود قریشی کریں گے۔ آج دوپہر تک کمیٹی رپورٹ پیش کردے گی۔

قبل ازیں وزیر اعظم آزاد کشمیر سردار عبدالقیوم نیازی کے خلاف تحریکِ عدم اعتماد پی ٹی آئی کے وزیرِ مالیات ماجد خان اور اکبر ابراہیم کی جانب سے جمع کرائی گئی۔ درخواست گزاروں نے سردار تنویر الیاس کو نیا وزیر اعظم نامزد بھی کیا ہے۔