عمران خان کو چاہئے کہ عزت سے استعفیٰ دے کر گھر چلے جائیں، مریم نواز

مسلم لیگ ن کی نائب صدر مریم نواز نے کہا ہے کہ عمران خان کے پاس اب کوئی کارڈ نہیں ہے، انہیں چاہئے کہ عزت سے استعفیٰ دے کر گھر چلے جائیں۔ 

تفصیلات کے مطابق مہنگائی مکاؤ مارچ لاہور سے اسلام آباد کیلئے روانہ ہوگیا، جس کی قیادت ن لیگ کی نائب صدر مریم نواز کررہی ہیں۔

اس موقع پر صحافیوں سے گفتگو میں مریم نواز کا کہنا تھا کہ ابھی تو فیروز پور روڈ پر پہنچیں ہیں، اسلام آباد پہنچیں گے تو حکومت کا خاتمہ ہوچکا ہوگا، حکومت جا چکی ہے، بس خدا حافظ کہنے جا رہے ہیں، عمران خان کے پاس اب کوئی کارڈ نہیں ہے، انہیں چاہئے کہ عزت سے استعفیٰ دے کر گھر چلے جائیں۔

یہ بھی پڑھیں: ن لیگ کا مہنگائی مکاؤ مارچ، ماڈل ٹاون سے اسلام آباد کیلئے روانہ

انہوں نے کہا کہ عمران خان کو بچانے کیلئے کوئی بھی نہیں آئے گا، انہیں یہ نہیں پتہ کہ گورننس، معیشت اور خارجہ پالیسی کس چیز کا نام ہے۔

مریم نواز نے کہا کہ عمران خان دو دو سیٹ والوں سے منتیں کررہا ہے لیکن اب کچھ نہیں ہونے والا، جنتر منتر سے ملک کو چلایا جارہا تھا، ملک اس کا متحمل نہیں ہوسکتا، اس جادو ٹونے سے ملک کو آزاد کرانا ہے۔

ان کا کہنا تھا کہ نواز شریف نے جب بھی کسی چیز میں ہاتھ ڈالا اللہ نے انہیں سرخرو کیا، پاکستان کے عوام کیلئے قدم اٹھایا ہے، جو مہنگائی، لاقانونیت اور بیڈ گورننس میں پس رہے ہیں، بیڈ گورننس سے نجات کا سفر ہے، عوام نواز شریف کو آواز دے رہے ہیں۔

مزید برآں ن لیگی نائب صدر نے حکومت پر کرپشن کا الزام لگاتے ہوئے کہا کہ پوسٹنگز کیلئے پیسے لیے جاتے ہیں یہ میگا اسکینڈلز کا باپ ہوگا، اداروں میں ترقیاں، تقرر و تبادلے بغیر رشوت کے نہیں ہورہے، سب جانتے ہیں اس کی رقم کہاں جارہی ہے، اس کے ثبوت آئیں گے تو لوگوں کی آنکھیں کھلیں گی۔