کراچی:شہر قائد کے ترقیاتی کاموں کیلئے بلدیہ عظمیٰ کراچی میں ایک ارب کے ٹینڈرز کی بندر بانٹ کا انکشاف ہوگیا۔ وفاق کے نمائندے کے ایم سی کے اعلیٰ عہدیداروں میں 6 چھ فیصد، ڈائریکٹر جنرل انجینئرنگ کے 2 فیصد اور ایک فیصد فنانس افسران کو، اس طرح ایک ارب کے ٹھیکوں کا 15 فیصد مبینہ طور پر ٹھیکہ دینے کی مد میں طلب کیا گیا ہے۔ جو 15 کروڑ روپے بنتا ہے۔
ذرائع کا کہنا ہے کہ یہ مبینہ 15 کروڑ روپے صرف ٹینڈر ایوارڈ کرنے کی مد میں ہیں۔ اس طرح کراچی پیکیج کے تحت وفاق سے ملنے والے ایک ارب آپس میں بانٹ لئے گئے۔
باخبر ذرائع کے مطابق ترقیاتی کام ٹینڈرز کی الاٹمنٹ جعلی قرعہ اندازی کرکے من پسند ٹھیکیداروں کو کردی گئی، کے ایم سی محکمہ انجینئرنگ کے ڈی جی اقتدار احمد نے ٹینڈرز بغیر کسی صحت مند مقابلے کے ایوارڈ کردئیے۔ جس سے کے ایم سی کے ٹھیکیداروں میں شدید بے چینی پائی جاتی ہے۔ اور آئندہ دنوں میں شدید احتجاج کا امکان ہے۔
کراچی میں ترقیاتی منصوبے کے لیے وفاقی حکومت نے 5 ارب روپوں میں سے پہلی قسط کے طور پر ایک ارب روپے فنڈ جاری کیے ہیں۔ اگر باقی کے 4 ارب میں بھی گھپلا ہوا تو اس کانقصان کراچی کے شہریوں کو ہی ناقص اور گھٹیا طرز تعمیرات کی شکل میں بھگتنا پڑ سکتا ہے۔
ذرائع کا کہنا ہے کہ محکمہ انجینئرنگ بلدیہ عظمیٰ کراچی نے ٹھیکیداروں سے بھاری کمیشن کے عوض معاملات طے کرکے ایک ارب روپوں کے 9 ترقیاتی منصوبے پرچی اور قرعہ اندازی کے ذریعے مند پسند ریٹس پر الاٹ کردئیے۔
یہ تمام غیر قانونی کام میئر کراچی اور میٹرو پولیٹن کمشنر کے علم میں لانے کے بعد ان کی مشاورت سے ڈی جی اقتدار نے انجام تک پہنچائے۔ واضح رہے کہ متعلقہ ٹھیکیداروں کی بغیر شمولیت کے جعلی قرعہ اندازی پر ”سیپرا” نے بھی مجرمانہ خاموشی اختیار کر کے سارے معاملے ک مشکوک بنا دیا ہے۔
میئر کراچی وسیم اختر اور ورکس کمیٹی کے چیئرمین حسن نقوی فریئر ہال سے براہراست مانیٹرنگ کرتے رہے، 1 ارب روپے مالیت کے ٹینڈرز کو کھولنے کی تاریخ بار بار تبدیل کی جاتی رہی، ٹینڈر اجرا کا التوا ٹھیکیداروں سے کمیشن کے معاملات طے نہ ہوپانا بتایا جارہا ہے۔
گوگل نیوز پر ہمیں فالو کریں
